Ռուսիոյ գործող նախագահ Վլատիմիր Փութին երէկ Ռուսիոյ մէջ տեղի ունեցած նախագահական ընտրութեան ընթացքին արձանագրեց մեծ յաղթանակ մը` ապահովելով յաւելեալ վեց տարուան պաշտօնավարութեան շրջան մը:
Վիճակագրական առաջին արդիւնքներուն համաձայն, ան ստացած է քուէներուն 73,9 առ հարիւրը: Մասնակցութեան համեմատութիւնը 64 առ հարիւր էր, ինչ որ 2012-ի նախագահական ընտրութենէն նուազ է:
Ռուսիոյ քաղաքացիները երէկ երկրին տարածքին 97 հազար եւ արտասահմանի մէջ 400 ընտրական կեդրոններ ուղղուեցան` ընտրելու համար իրենց երկրին նախագահը:
Քուէարկելու իրաւունք ունին 100 միլիոն քաղաքացիներ:
Ռուսիոյ նախագահ Վլատիմիր Փութին Մոսկուայի մէջ իր քուէարկութենէն ետք յայտնեց, որ յաջողութիւն պիտի նկատէ ընտրական որեւէ արդիւնք, որ իրեն «իրաւունք կու տայ նախագահի պարտականութիւնները կատարել»:
Փութինի 7 մրցակիցներու շարքին էին միլիոնատէր համայնավար Փաւել Կրուտինինը, պատկերասփիւռի նախկին հաղորդավար Քսենիա Սոպչաքը եւ վեթերան ազգայնական Վլատիմիր Ժիրինովսքին:
65-ամեայ Փութին 1999-էն ի վեր իբրեւ նախագահ կամ վարչապետ Ռուսիոյ իշխող ղեկավարն է:
Նշենք նաեւ, թէ Ռուսիոյ նախագահական ընտրութիւններուն առիթով երէկ Հայաստանի մէջ (Երեւան եւ Գիւմրի) Ռուսիոյ դեսպանատան շէնքին մէջ ընտրական տեղամասեր տեղադրուած են, ուր բարձր եղած է ռուսահպատակ քաղաքացիներուն մասնակցութիւնը: Քուէարկողներու հերթեր յառաջացած են:
All the contents on this site are copyrighted ©. |