«Տինք իր մահով օգուտ տուաւ մարդկութեան»․Տինքի սպանութեան գործով մեղադրեալ
Հրանդ Տինքի սպանութեան գործով դատական հերթական նիստին պաշտպանական ճառով հանդէս եկած է Պոլսոյ ոստիկանութեան հետախուզութեան նախկին աշխատակից Մուհարեմ Տէմիրքալէն:
Ինչպէս կը տեղեկացնէ «Ակօսե»ը, թուրք հետախոյզը իր պաշտպանական ճառին մէջ հերքած է իրեն ուղղուած մեղադրանքները Տինքի սպանութեան հետ կապուած` շեշտելով, որ իրենց դէմ մեղադրանքները շինծու են:
Մուհարեմ Տէմիրքալէն խօսքը ուղղած է նաեւ Տինքի ընտանիքին․ «Յարգելի ընտանիք, կ՛ուզեմ ձեզի դիմել: Այս ստոր դաւադրութեան մէջ ես որեւէ կապ չունիմ: Որպէս այս հողերու վրայ ապրող մարդիկ, դուք գիտէք, որ այստեղ մարդիկ յայտնի կը դառնան սպաննուելէն ետք: Միլիոնաւոր մարդիկ Հրանդը գետնին պառկած տեսնելէ ետք ըսին, որ իրենք անոր նման մէկն են ու Հրանդը իրենցմէ մէկն է: Ի հարկէ, այդ ամէնը Հրանդը ետ չի բերեր, սակայն որքան ալ որ ցաւալի է, որոշ մարդիկ իրենց մահով մարդկութեան օգուտ կու տան»:
Դատական նիստի շարունակութիւնը պիտի նշանակուի Մարտ 15-ին:
| All the contents on this site are copyrighted ©. |