Ուաշինկթըն կը նշէ հիւսիսային Քորէայի հետ բանակցութիւններու սկսելու գլխաւոր պայմանը
Միացեալ Նահանգներու արտաքին գործոց նախարարութեան բանբեր Հետըր Նոուըրթ յայտարարեց, որ Հիւսիսային Քորէան Միացեալ Նահանգներու հետ բանակցութիւններու սկսելու համար պէտք է ցոյց տայ հիւլէական զէնքերէ ձերբազատման մտադրութիւններու լրջութիւնը:
«Մենք պիտի ուզէինք բանակցութիւններ վարել Քիմ Չեն Ընի հետ, երբ ժամանակը գայ: Երբ անոնք ցոյց տան, որ իրենք լուրջ տրամադրուած են հիւլէական զէնքէ ձերբազատման ուղղութեամբ շարժելու համար: Մենք ատիկա տակաւին չենք տեսներ», յայտարարած է Նոուըրթ:
Ան միեւնոյն ժամանակ չէ նշած բանակցութիւններու սկիզբին համար նախնական պայմանները: Նոուըրթ մասնաւորաբար չէ պատասխանած այն հարցումին, թէ արդեօք ատոր համար բաւական պիտի ըլլա՞ն Հիւսիսային Քորէայի պարտաւորութիւնները` հարուած չհասցնելու ամերիկեան Կուամ կղզիին դէմ: «Անոնք գիտեն, թէ ի՛նչ պէտք է ընել», ըսած է ան:
Նախապէս հաղորդուած էր, որ Հիւսիսային Քորէայի ղեկավարը զինուորականներուն հրամայած է պատրաստ ըլլալու որեւէ պահու հարուածելու Միացեալ Նահանգներուն պատկանող տարածքները:
Քիմ Չեն Ըն Քորէայի ազգային բանակի սպաներուն հետ քննարկած է Խաղաղական ովկիանոսին մէջ գտնուող Կուամ կղզիի վրայ գտնուող ամերիկեան ռազմակայանը հարուածելու ծրագիրը:
Հիւսիսային քորէական կառավարութեան մօտիկ աղբիւրներուն համաձայն, Փիոնկիանկ մտադիր է 4 հրթիռ արձակել Կուամի ուղղութեամբ:
| All the contents on this site are copyrighted ©. |