Այսօր` 14 Փետրուարին, «Էրեբունի» օդակայանէն բեռնատար օդանաւը Սուրիա տեղափոխեց 40 թոն մարդասիրական օգնութիւն: Անիկա կը ներառէ պարէն, առաջին անհրաժեշտութեան պարագաներ:
«ՀԱՊԿ ծիրէն ներս եղած է Ռուսիոյ առաջարկը, համադրել ջանքներն ու օգնութիւն ուղարկել Սուրիա: Մենք շատ շնորհակալ ենք Ռուսիոյ բեռնատար օդանաւի տրամադրման համար, որ հնարաւոր կը դարձնէ այս օգնութեան տեղափոխումը»,- լրագրողներուն յայտնած է Պաշտպանութեան նախարար Վիգէն Սարգսեան:
Նախարարը շեշտած է ծանր վիճակի մէջ գտնուող Սուրիոյ ժողովուրդին օգնութեան տրամադրումը, քանի որ Հայաստանն ալ շատ անգամներ զգացած է մարդասիրական օգնութեան կարեւորութիւնը:
«Բարեկամ Սուրիոյ պարագային ատիկա առանձնապէս կարեւոր է: Մենք շատ լաւ կը յիշենք, որ մէկ դար առաջ արհաւիրքի ժամանակ Սուրիան բացաւ իր դռները հայ ժողովուրդին առաջ: Մենք յոյս ունինք, որ օր առաջ Սուրիոյ մէջ խաղաղութիւն հաստատուի եւ մարդիկ կարենան վերադառնալ բնականոն կեանքի»,-ըսած է նախարարը:
Անոր խօսքով, մինչ այդ Հայաստանը պատրաստ է ու աջակցելու բարեկամ երկրի ժողովուրդին:
Արտաքին գործոց նախարարութեան խօսնակ Տիգրան Բալայեան յայտնեց, որ Հայաստանի մարդասիրական օգնութեամբ օդանաւը վայրէջք կատարած է Սուրիա:
Յիշեցնենք, Սուրիական հակամարտութենէն տուժած բնակիչներուն մարդասիրական օգնութիւն ուղարկելու նպատակով ՀՀ կառավարութիւնը պահուստային ֆոնտէն յատկացուցած է աւելի քան 46 միլիոն դրամ:
ՀՀ նախագահի յանձնարարութեամբ սուրիական հակամարտութենէն տուժած բնակիչներուն աջակցելու համար անցեալ տարուան Հոկտեմբեր 3-ին, ապա 5-ին Երեւանէն Սուրիա մեկնած է մարդասիրական օգնութիւն տեղափոխող երկու օդանաւ: Հայաստանի Հանրապետութեան մարդասիրական օգնութեան բեռներուն վրայ մակագրուած էր. «Խաղաղութեան ջերմ մաղթանքներով Հայաստանէն` Սուրիոյ եղբայրական ժողովուրդին»:
All the contents on this site are copyrighted ©. |