(Ռատիօ Վատիկան) Ֆրանչիսկոս Քահանայապետը` յառաջիկայ 6 Յունիս 2015-ին առաքելական ճամբորդութիւն մը պիտի կատարէ դէպի Սարայեվօ։ Այդ կը հանդիսանայ Ֆրանչիսկոս Պապին 8-րդ միջազգային ճամբորդութիւնը եւ այցելած երկիրներուն 11-րդը։
Ժամադրութիւններով խիտ Առաքելական միօրեայ ճամբորդութիւնը կ՛եզրափակուի Ֆրանչիսկոս Պապին` երիտասարդներուն հետ ունեցած հանդիպումով։ Առաքելական ճամբորդութեան բնաբանն է ''Խաղաղութիւնը քեզ հետ''։
Սարայեվօ այցելութեան յայտագիրը կը նախատեսէ հինգ կարեւոր հանդիպումներ եւ ճառեր։
6 Յունիսի առաւօտեան ժամը 7,30-ին, Սրբազան Հայրը կը մեկնի Հռոմի Ֆիումիչինօ միջազգային օդակայանէն եւ Սարայեվօ կը հասնի ժամը 9-ին։
Բարի գալուստի արարողութենէն ետք հանդիպում կ՛ ունենայ հանրապետութեան նախագահութեան երեք անդամներուն ու երկրի իշխանութիւններուն հետ։ Որմէ ետք քաղաքի մարզադաշտին մէջ կը մատուցէ բացօթեայ սուրբ պատարագը։Կէսօրին` առաքելական դեսպանատան մէջ սիրոյ ճաշը կը բաժնեկցի տեղական եպիսկոպոսներուն հետ։
Յետմիջօրէին Սրբազան Հայրը կը հանդիպի կղերական դասին հետ ու Ֆրանչիսկեաններուն կեդրոնին մէջ կը մասնակցի համամիութենական ու միջ-կրօնական աղօթքին որուն աւարտին հանդիպում կ՛ունենայ երիտասարդներուն հետ։
Պոզնիայի եւ Էրծեկովինայի եկեղեցական վիճակագրական տուեալները։
Երկիրը ունի 51.197 տարածութիւն։ Բնակչութիւնը կը հաշուէ 3 միլիոն 833 հազար, որոնցմէ 439 հազարը կաթողիկէ են։
Կաթողիկէ Եկեղեցին ունի 4 Եկեղեցական գաւառներ եւ 304 ժողովրդապետութիւններ ուր կը գործեն 6 եպիսկոպոսներ, 280 թեմական քահանաներ եւ 344 կրօնաւոր քահանաները, 14 մնայուն սարկաւագներ, 537 կրօնաւորուհիներ եւ 144 կրօնուսոյցներ։ Փոքր նորընծայարանի ժառանգաւորներու թիւն է 96, մինչ մեծ նորընծայարանի աշակերտութեանց թիւը կը հասնի 120-ի։
Եկեղեցին ունի 2445 մանկամսուրներ ու նախակրթարաններ, 2180 Ճեմարաններ։ Կաթողիկէ եկեղեցւոյ հովանաւորութեամբ կը գործեն 6 հիւանդանոցներ եւ դարմանատուներ ու չորս ծերանոցներ։
All the contents on this site are copyrighted ©. |