Ասորիներու լիկայի նախագահ Հապիպ Աֆրամ երէկ Ֆրանչիսկոս պապին յղեց նամակ մը, որուն մէջ
հետեւեալը խնդրեց պապէն. «Երբ Թուրքիա հասնիք, մի՛ մոռնաք, որ դուք Արեւելքի քրիստոնեայ
համայնքին տէրն ու տիրականն էք` Անտիոքէն մինչեւ Կոստանդնուպոլիս, Բեթղեհէմ, Լեռնալիբանան,
Մաալուլա, Սայտնայա եւ այլ շրջաններուն մէջ կերտուած քրիստոնեայ համայնքին պատմութեան»:
Այս մասին կը հաղորդէ “Ազդակ”-ը: Աֆրամ Ֆրանչիսկոս պապին յիշեցուց Օսմանեան կայսրութեան
կողմէ հարիւր տարի առաջ շրջանէն քրիստոնեայ` հայկական, ասորիական եւ յունական գոյութիւնը
արմատախիլ ընելու պատասխանատուութիւնը: «Կոչ կ՛ուղղեմ պապին պահանջելու Թուրքիայէն ընդունիլ
եւ յստակ կերպով ու թափանցիկութեամբ ճանչնալ պատահածը` իբրեւ խղճի արդարահատոյց եւ ինքնաքննադատութիւն:
Մեր պապերուն աճիւնները մեզի կը կանչեն, որովհետեւ արդարութիւնը եւ իրականութիւնը Թուրքիոյ
պատկերը աղաւաղելու կամ անկէ վրէժ լուծելու նպատակով չեն, այլ` փայլուն ապագայ ունեցող
Արեւելք մը կերտելու նպատակով: Մենք ենք զոհերն ու նահատակները, իսկ Թուրքիա չի կրնար
ուրանալ եւ անմեղ ձեւանալ, որովհետեւ մեր յիշողութիւնը երեւակայութիւն չէ», շեշտեց Աֆրամ: Ան
ընդգծեց, որ Թուրքիա այսօր եւս կը գտնուի մարտահրաւէրներու դիմաց` ալեւիներուն, քիւրտերուն
եւ քրիստոնեաներուն հետ իր վարուելակերպին առումով: «Թուրքիա իր ամբողջ կարողութիւններով
ի վիճակի է ազատ արձակելու առեւանգուած առաջնորդներ Եուհաննա Իպրահիմ եւ Պուլոս Եազիժի
եպիսկոպոսները, որոնք արեւելքցի, քրիստոնեայ եւ երկխօսութեան ջատագով երկու իշխաններ
են եւ շուրջ վեց հարիւր օրէ ի վեր անյայտ կորսուած: Արդեօք բոլոր եկեղեցիներուն հայրը
կ՛ընդունի՞, որ անոնք գերութեան մէջ մնան», հարց տուաւ Աֆրամ: