Նարեկացիի արձանը հասաւ Վատիկան. Բացման պաշտօնական արարողութիւնը 5 Ապրիլին։

(Ռատիօ Վատիկան) 2016-ի Յունիսին Ֆրանչիսկոս Սրբազան Քահանայապետին Հայաստան կատարած առաքելական այցելութեան ծիրէն  ներս,  ՀՀ նախագահ Սերժ Սարգսեանը Սրբազան Քահանայապետին նուիրեց Գրիգոր Նարեկացիի արձանի մանրակերտը ու զայն Քահանայապետին յանձնելու ժամանակ Նախագահ Սարգսեանը յոյս յայտնեց, որ այդ արձանի մեծ նմուշը տեղադրուի Վատիկանի մէջ: Ֆրանչիսկոս Պապ որ 2015-ի Ապրիլ 12-ին, Սուրբ Պետրոսի Մայր տաճարին մէջ Մեծ Եղեռնի հարիւրերորդ տարելիցի ոգեկոչման առթիւ  մատուցած Սուրբ Պատարագի ընթացքին Նարեկացին հռչակած էր Տիեզերական Եկեղեցւոյ Վարդապետ, սիրայօժար ընդունեց այդ առաջարկը եւ քիչ ժամանակ ետք ստեղծագործական կազմը՝ Հայաստանի ժողովրդական նկարիչ, Նարեկացի արձանի հեղինակ Դաւիթ Երևանցիի  գլխաւորութեամբ գործի լուծուեցաւ պատրաստելու այդ արձանը։

Ինչպէս կը յայտնէ Սուրբ Աթոռի մօտ  ՀՀ արտակարգ եւ լիազօր դեսպան Տիար Միքայէլ Մինասեան՝ Ճարտարապետ Միքայէլ Հասրաթեանը և ծրագրի ղեկավար՝ Վարդան Կարապետեանը աշխուժ  կերպով ստանձնեցին արձանի ստեղծման աշխատանքները, իսկ Արթուր Ջանիբեկեանը՝ Վսեմաշուք դեսպան Մինասեանի ընկերը, «որ ի դէպ, աշխարհում Նարեկի տարածման իսկական նուիրեալ է» ինչպէս կը յայտնէ միշտ Սուրբ Աթոռի մօտ ՀՀ դեպանը, միացաւ դեսպանին ու դարձաւ արձանի երկրորդ բարերարը:
Ստեղծագործական խումբի քրտնաջան աշխատանքի արդիւնքով  Չեխիայի մէջ  ձուլուեցաւ Գրիգոր Նարեկացիի երկու մետր բարձրութիւն ունեցող պրօնզէ արձանը, որ ապա փոխադրուեցաւ Վատիկան ու 21 մարտին տեղադրուեցաւ Վատիկանի այգիներուն մէջ։

Արձանի բացման պաշտօնական արարողութիւնը նախատեսուած է յառաջիկայ 5 ապրիլին Ֆրանչիսկոս Սրբազան Քահանայապետի գլխաւորութեամբ ու ներկայութեամբ՝ ՀՀ Նախագահ Սերժ Սարգսեանի, Ամենայն Հայոց Կաթողիկոս Գարեգին Բ-ի, Մեծի Տանն Կիլիկիոյ Կաթողիկոս Արամ Ա-ի եւ Տանն Կիլիկիոյ կաթողիկէ Հայոց Ամենապատիւ Տէր Գրիգոր Պետրոս Ի Կաթողիկոս Պատրիարքի։