Քրեմլին. «Սքրիփալի հարցով Լոնտոնին մեր հակադարձութիւնը պիտի չուշանայ»
Քրեմլին յայտարարեց, որ Ռուսիոյ արտաքին գործոց նախարարութիւնն ու այլ նախարարութիւններ կը պատրաստեն լրտես Սերկէյ Սքրիպալի թունաւորման հարցով Բրիտանիոյ հակադարձութեան առաջարկներ` նշելով, որ հակադարձութիւնը պիտի չուշանայ, եւ վերջնական որոշումը կը պատկանի Վլատիմիր Փութինին:
Քրեմլին նաեւ նշեց, որ Ռուսիոյ նկատմամբ Բրիտանիոյ կեցուածքը «անպատասխանատու» է եւ «Լոնտոն միջազգային օրէնքը կը խախտէ»:
Ռուսիոյ արտաքին գործոց նախարար Սերկէյ Լաւրով իր կարգին յայտնեց, որ Մոսկուա շուտով բրիտանացի դիւանագէտներ պիտի արտաքսէ` հակադարձելով Լոնտոնի կողմէ ռուս դիւանագէտներու արտաքսման քայլին:
Ռուսիոյ արտաքին գործոց նախարարութեան բանբեր Մարիա Զախարովա յայտնեց. «Մոսկուա մօտ օրէն պիտի որդեգրէ Լոնտոնին հակադարձելու միջոցառումներ»: Ան Սքրիփալի հարցով Լոնտոնի որդեգրած միջոցառումները նկատեց «քարոզչական ու քաղաքական շոու»:
«Արեւմուտքը կը փորձէ լրտես Սքրիփալի հարցը կապել սուրիական քիմիական հարցին», նշեց Զախարովա:
Միւս կողմէ, Ֆրանսա, Գերմանիա, Միացեալ Նահանգներ եւ Բրիտանիա միացեալ հաղորդագրութիւն մը հրապարակելով յայտնեցին, որ Ռուսիոյ պատասխանատուութեան «հաւաստի այլընտրանքային բացատրութիւն գոյութիւն չունի»:
| All the contents on this site are copyrighted ©. |