Ընկերային ցանցեր:

RSS:

Ռատիօ Վատիկան

Քահանայապետի եւ Եկեղեցւոյ ձայնը աշխարհի հետ երկխօսութեան մէջ

Լեզու:

Ֆրանչիսկոս Քահանայապետ \ Գործունէութիւն

Սանդ Էճիտիօ հասարակութեան 50-րդ տարեդարձ. Ֆրանչիսկոս Պապին հասարակութեան տուած այցելութիւնը։

Ֆրանչիսկոս Պապին Սանդ Էճիտիօ հասարակութեան այցը

12/03/2018 10:00

(Ռատիօ Վատիկան) 11 մարտ 2018-ի յետմիջօրէին  Ֆրանչիսկոս Սրբազան Քահանայապետը Սանդ Էճիտիօ հասարակութեան հիմնադրութեան 50-րդ տարեդարձին առթիւ, այցելեց հասարակութեան Հռոմի «Թրասթեվերէ» շրջանին մէջ գտնուող կեդրոնատեղին՝ Սանթա Մարիա Ին թրասթեվերէ  Պազիլիքան, ուր Սանդ Էճիտիոյի հասարակութիւնը կը համախմբուի ամէն երեկոյ հասարակական աղօթք կատարելու համար։ Քահանայապետի ժամանումին, ու հակառակ տեղատարափ անձրեւին, հազարաւոր հաւատացեալներ ու հասարակութեան անդամներ համախմբուած էին Պազիլիքայի շրջափակին մէջ ու Պազիլիքային ներքոյ։

Նախ քան Պազիլիքա մուտք կատարելը՝  Նորին Սրբութիւնը դիմաւորուեցաւ հասարակութեան նախագահ՝ Տիար Մարքօ  Իմփալիացցոյի կողմէ որ այս առթիւ արտասանած ողջոյնի խօսքին մէջ ընդգծեց թէ «տխուր իրողութիւն է տեսնել Եկեղեցի մը որ աղքատները ունի որպէս «յաճախորդ» եւ ոչ որպէս եղբայրներ», ապա Քահանայապետին ապահովեցուց թէ «հասարակութիւնը կ՛ուզէ Իրեն հետ միասին երազել բոլորին համար Եկեղեցի մը, առանց որեւէ մէկուն բացառութեան, որպէսզի Աստուծոյ Ողորմութիւնը դպչի բոլորին սրտերուն»։

Հուսկ Պազիլիքայի մէջ տեղի ունեցաւ ժամասացութեան արարողութիւն որուն ընթացքին ներկայացուեցան նաեւ մի քանի վկայութիւններ, որոնց շարքին 80 ամեայ ծերունի մայրիկի մը վկայութիւնը, Սուրիացի փախստական երիտասարդի մը վկայութիւնը ու «միջազգային միջնորդ» ուսանողի մը վկայութիւնը, որոնցմէ ետք խօսք առաւ նաեւ Սանդ Էճիտիօ հասարակութեան հիմնադիրը՝ Տիար Անտրէա Ռիքքարտին, որմէ ետք  Սրբազան Քահանայապետը իր պատգամը ուղղեց ներկաներուն գնահատելով հասարակութիւնը որ ուզեց իր այս Յոբելեանը նշել «քրիստոնէական» ձեւով ոչ թէ պարզ «հաշուեկշիռ»  կատարելու համար, այլ հաւատքը կերպարանափոխելու՝ «Աւետարանական նոր խիզախութեան» որով կը գերազանցուին պատնէշներն ու սահմանները՝ վասն միութեան»։

Շնորհակալութիւն յայտնելով ներկաներուն ցուցբերած վեհանձնութեան համար Քահանայապետը մէջբերեց աւետարանական «քանքարներու առակը» մատնանշելով թէ Հասարակութեան քանքարները «աղօթք, աղքատներ ու խաղաղութիւնն» են։ Ան ապա նշեց թէ առակին մէջ ծառաներէն մին վախէ մղուած «քանքարը» կը պահէ ու զայն չ՛օգտագործեր, այդ մէկը նմանեցնելով  այսօրուայ աշխարհին «ուր կը տիրէ վախ եւ զայրոյթ»։ «Վախ որ շատ անգամ կը կեդրոնանայ օտարականին, մեզմէ տարբերին, աղքատին վրայ, կարծես թէ ան ըլլար մեր թշնամին» ըսաւ Սրբազան Քահանայապետը ու խրախուսեց հասարակութեան անդամները ապագային նայելու եւ ընթանալու դէպի ապագայ Եկեղեցւոյ հետ միասին։ Ան ապա յիշեց պատերազմները՝ յատկապէս մատնանշելով Սուրիացի ժողովուրդի տառապանքին, հուսկ ընդգծեց Աստուծոյ Խօսքին կարեւորութիւնը որ «անցեալին մէջ պաշտպանեց հասարակութիւնը գաղափարախօսութեան փորձութենէն ու այսօր զանոնք կ՛ազատագրէ վախի սպառնալիքէն»։

«Սիրեցէք ու միշտ աւելիով մօտեցէք Սուրբ Գիրգին» յորդորեց Սրբազան Քահանայապետը աւելցնելով թէ այնտեղ կը գտնուի ողորմութեան ակնաղբիւրը՝ աղքատներու, կեանքի ու պատերազմներու վիրաւորներու նկատմամբ» ապա նշեց թէ այդ հոգեւորականութիւնը կը բխի Վատիկանեան Բ տիեզերական  ժողովէն որ կը «սորվեցնէ ուշադիր ու վեհանձն գթութիւն ունենալ աշխարհի հանդէպ»։

Սրբազան Հայրը  մատնանշեց ապա համաշխարհայնացումին որ՝ թէեւ ունի  դրական երեւոյթներ,  «սակայն շատերուն համար ու յատկապէս աղքատներուն դիմաց բարձրացուց նոր պատնէշներ» յարեց Նորին Սրբութիւնը հրաւիրելով ներկաները կառուցելու «զօրակցութեան ու հոգեկան համաշխարհայնացում» եւ այս ուղղութեամբ հաստատելով թէ համաշխարհայնացած աշխարհի ապագան կը կայանայ միասին ապրելու մէջ, որուն համար հարկ է կառուցել կամուրջներ, բաց պահել երկխօսութիւնը, ու շարունակել իրարու հետ հանդիպումները։

«Ամէն մէկը հրաւիրուած է բարեփոխելու իր սիրտը ու ողորմած հայեացք ունենալու ուրիշին նկատմամբ» ըսաւ Ֆրանչիսկոս Պապ ընդգծելով թէ այս մէկը կը ծառայէ դառնալու խաղաղութեան գործիչ ու ողորմութեան մարգարէ։

Նորին Սրբութիւնը ներկաները զգուշացուց «անտարբերութեան» երեւոյթէն. «Երբեք մի ըսէք «ինծի ինչ – ես չեմ խառնուիր»  ըսաւ Ան ու հրաւիրեց հասարակութիւնը Աւետարանը հաղորդելու յանդգնութեամբ՝ անձնական բարեկամութեան միջոցաւ,  ստեղծելով ընկերութիւն մը ուր ոչ մէկը ինքզինք օտարական զգայ, շրջանցելով սահմաններն ու պատնէշները՝ միութիւն ստեղծելու համար»։

Ճառին աւարտին Ֆրանչիսկոս Պապ քաջալերեց Սանդ Էճիտիոյի հասարակութեան անդամները շարունակելու իրենց գործունէութիւնը, մօտիկ ըլլալու արուարձաններու մէջ գտնուող մանուկներուն «խաղաղութեան դպրոցներ» ծրագրի միջոցաւ, խնամք տանելու տարեցներուն՝ որոնք յաճախ անտեսուած են, պատերազմի ու անօթութեան թիրախ անձերուն մարդասիրական օգնութիւն մատուցելու…«Աղքատները ձեր գանձն են»  յարեց Ֆրանչիսկոս Պապ ու խօսքը եզրափակեց ըսելով «Դուք Քրիստոսին կը պատկանիք, շարունակեցէք Անոր պատկանիլ, աղօթքի մէջ, ձեր փոքրիկ եղբայրներու տածած խնամքի միջոցաւ, ու խաղաղութեան փնտռտուքի մէջ, որովհետեւ Քրիստոսն է մեր խաղաղութիւնը»։ 

12/03/2018 10:00