Գերապայծառ Պեթանքուր նշանակուեցաւ նաեւ Վրաստանի մօտ առաքելական դեսպան։

(Ռատիօ Վատիկան) Հինգշաբթի 8 մարտ 2018-ին,  Հայաստանի Հանրապետութեան մօտ առաքելական դեսպան նշանակուելէ մէկ շաբաթ ետք, գերապայծառ Խօսէ Ավելինօ Պեթանքուրը՝ Ֆրանչիսկոս Սրբազան Քահանայապետին կողմէ նշանակուեցաւ նաեւ Վրաստանի մօտ առաքելական դեսպան։

Գերապայծառ Պեթանքուրը մինչեւ օրս կը վարէր  Վատիկանի Պետական Քարտուղարութեան  արարողակարգի (փրոթոքոլի) ղեկավարի պաշտօնը։

Գերապայծառ Պեթանքուր ծնած է Փորթուկալի մէջ՝ 23 մայիս 1962-ին։ Քահանայ ձեռնադրուած է 29 յունիս 1993-ին եւ 1 Յուլիս 1999 էն սկսեալ մաս կազմած է Սուրբ Աթոռի դիւանագիտական ծառայութեան։ Իրաւաբան՝ գերապայծառ Պեթանքուրը 14 նոյեմբեր 2012-ին կը նշանակուի Սուրբ Աթոռի Պետական Քարտուղարութեան արարողակարգի ղեկավար։ Ան հմուտ է 5 լեզուներու՝ Անգլերէն, Ֆրանսերէն, Իտալերէն, Փորթուկալներէն եւ Սպաներէն։ Տիտղոսաւոր արքեպիսկոպոսն է Չիթթանովա քաղաքին։