(Ռատիօ Վատիկան) Ընդառաջելով Ֆրանչիսկոս Պապին խնդրանքին, ողորմութեան արտակարգ յոբելեաենի առթիւ ընթացք առած Ողորմածութեան «Ուրբաթ օրեր» ձեռնարկը տակաւին կը շարունակուի։ Ձեռնարկին նպատակն է նեցուկ կարգնիլ դժուարին պայմաններուն մէջ ապրող եւ ընկերութեան կողմէ անտեսուած եւ մեկուսացուած վիճակի մէջ գտնուող անձերուն:
Ուրբաթ, 2 մարտ 2018-ին՝ յետմիջօրէի 4,00-ին, Ֆրանչիսկոս Սրբազան Քահանայապետ, ընկերակցութեամբ նոր Աւետարանումի խորհուրդի նախագահ գերապայծառ Ռինօ Ֆիզիքելլային անակնկալ այցելութիւն տուաւ Հռոմի «Էուր» շրջանին մէջ գտնուող «Քազա Տի Լետաօ» անուան բարեսիրական կեդրոնին , ուր հիւրընկալուած են ազատազրկուած բանտարկեալ կիներ իրենց անչափահաս զաւակներով :
Կեդրոն ժամանումին Ֆրանչիսկոս Պապ մեծ հմայքով ու ուրախութեամբ դիմաւորուեցաւ կեդրոնի հիւրերուն՝ մայրերու ու անոնց փոքրիկներուն կողմէ ինչպէս նաեւ կեդրոնի մէջ ծառայող պաշտօնեաներուն կողմէ :
Նշենք թէ վերոնշեալ բարեսիրական կեդրոնին մէջ կը գտնուին 25-էն – 30 տարեկան հինգ մայրեր իրենց զաւակներով, որոնց հետ Ֆրանչիսկոս Պապ առիթ ունեցաւ զրուցելու ու փոքրիկներուն հետ խաղալու անոնց նուիրելով Սուրբ Զատկուայ հաւկիթներ:
Մանուկները իրենց կարգին Ֆրանչիսկոս Պապին հրաւիրեցին նախընթրիքի: Մինչ բանտարկեալ մայրերը Նորին Սրբութեան շնորհեցին կեդրոնին մէջ պատրաստուած նուէրներ:
Սրբազան Հօր հետ ունեցած զրոյցին ընթացքին կեդրոնի հիւրերը երախտագիտութեամբ արտայայտուեցան բարեսիրական կեդրոնի մասին որուն մէջ հակառակ բոլոր դժուարութիւններուն հնարաւորութիւնը ունին իրենց զաւակները մեծցնելու:
Անակնկալ այցելութեան աւարտին Ֆրանչիսկոս Պապ կեդրոնի մայրերուն շնորհեց մի քանի նուէրներ,որոնց շարքին կեդրոնի տուած այցելութեան առ յիշատակ իր ստորագրութիւն կրող մագաղաթ մը:
Ֆրանչիսկոս Պապին «ողորմութեան ուրբաթ օր» ծրագրին մաս կազմող վերոնշեալ այցելութիւնը վերջ գտաւ ժամը 5,00ին, որմէ ետք Ան վերադարձ կատարեց Վատիկանի Սանթա Մարթա իր նստավայրը:
All the contents on this site are copyrighted ©. |