2018-03-02 09:41:00

Գերմանիա Թուրքիոյ կոչ ուղղած է դադրեցնելու Աֆրինի դէմ գործողութիւնը


Գերմանիոյ արտաքին գործոց նախարարութիւնը տարածած է յայտարարութիւն մը` շեշտելով, որ ՄԱԿ-ի Ապահովութեան խորհուրդին կողմէ Սուրիոյ մէջ միամսեայ զինադադարի մասին որոշումը կը վերաբերի նաեւ Աֆրինին, ուր իր զինուորական գործողութիւնը կը շարունակէ թրքական բանակը: Այս մասին կը գրէ գերմանական «Տէօչէ Վելլէ» պատկերասփիւռի կայանի թրքական ծառայութիւնը:

Գերմանիոյ արտաքին գործոց նախարարութեան բանբերը կոչ ուղղած է Թուրքիոյ կատարելու ՄԱԿ-ի Ապահովութեան խորհուրդի որոշումն ու դադրեցնելու Սուրիոյ հիւսիսը իր զինուորական գործողութիւնները:

Յիշեցնենք, որ նախապէս Միացեալ Նահանգներու արտաքին գործոց նախարարութեան բանբեր Հետըր Նոուըրթ եւս յայտարարած էր, թէ ՄԱԿ-ի Ապահովութեան խորհուրդի որոշումը կը վերաբերի նաեւ Աֆրինին, եւ խորհուրդ տուած էր Թուրքիոյ առաւել ուշադիր կարդալու գոյութիւն ունեցող փաստաթուղթը: Ատկէ ետք Թուրքիոյ արտաքին գործոց նախարարութիւնը Ուաշինկթընը մեղադրած էր Ապահովութեան խորհուրդի որոշումը խեղաթիւրելու յանցանքով:

Թուրքիոյ փոխվարչապետ, կառավարութեան բանբեր Պաքըր Պոզտաղ երէկ շեշտեց. «ՄԱԿ-ի Ապահովութեան խորհուրդին` Սուրիոյ մէջ միամսեայ զինադադար հաստատելու վերաբերեալ որոշումը պիտի չազդէ թրքական «Ձիթենիի ճիւղ» գործողութեան վրայ, որովհետեւ Անգարայի գնահատականին համաձայն, անոր չի վերաբերիր»` աւելցնելով, որ իրականութեան մէջ ամերիկացիներուն համար օգտակար պիտի ըլլայ որոշումը աւելի ուշադիր կարդալը:








All the contents on this site are copyrighted ©.