Ռուսիոյ արտաքին գործոց նախարար Սերկէյ Լաւրով երէկ յայտարարեց. «Սուրիոյ քիւրտերը սուրիացի ժողովուրդին մէկ անքակտելի մասն են, եւ սուրիական տագնապը կարելի չէ լուծել առանց անոնց մասնակցութեան»:
«Ռուսիա տակաւին կը շարունակէ աջակցիլ քիւրտերուն Սուրիոյ հարցի լուծման ամբողջ հոլովոյթին մասնակցութեան», աւելցուց ան:
«Ուաշինկթըն Սուրիոյ մէջ ինքնագլուխ ու վտանգաւոր կերպով կը գործէ եւ Սուրիոյ հողային ամբողջականութիւնը կը վտանգէ», նշեց Լաւրով` աւելցնելով. «Ռուսիան այն կասկածը ունի, որ Ուաշինկթըն կ՛ուզէ եթէ ոչ յաւիտեանս, առնուազն երկար ժամանակ մնալ Սուրիոյ մէջ»:
Ռուսիոյ արտաքին գործոց փոխնախարար Միխայիլ Պոկտանով իր կարգին շեշտեց. «Միացեալ Նահանգներ պատասխանատու են Սուրիոյ կարգ մը քիւրտերուն մօտ անջատողական տրամադրութեանց հրահրման»:
Միւս կողմէ, Ռուսիոյ պաշտպանութեան նախարարութիւնը երէկ յայտնեց, որ Ժապհաթ Նուսրան, գործակցաբար «Սպիտակ սաղաւարտներուն», Իտլիպի մէջ սադրանքներ կը պատրաստէ Դամասկոսը քիմիական զէնքի կիրարկման մէջ ամբաստանելու համար:
«Ժապհաթ Նուսրան քլոր պարունակող աւելի քան 20 տակառ փոխադրեց եւ սադրիչ գործողութիւն մը կը պատրաստէ», նշեց նախարարութիւնը:
All the contents on this site are copyrighted ©. |