Ընկերային ցանցեր:

RSS:

Ռատիօ Վատիկան

Քահանայապետի եւ Եկեղեցւոյ ձայնը աշխարհի հետ երկխօսութեան մէջ

Լեզու:

Ֆրանչիսկոս Քահանայապետ \ Գործունէութիւն

Ֆրանչիսկոս Պապ. «Արհամարել եւ նուաստացնել տկար անձը սատանայական գործ է»

Ֆրանչիսկոս Պապ - AP

08/01/2018 11:52

(Ռատիօ Վատիկան)  Երկուշաբթի, 8 յունուար 2018-ին, առաւօտեան, Վատիկանի Տոմուս Սանթա Մարթայի մատրան մէջ Ֆրանչիսկոս Պապ մատուցեց Սուրբ Պատարագ եւ այս առթիւ ներկայացուցած խորհրդածութեան մէջ անդրադարձաւ տկար եւ  դիւրաբեկ անձերուն՝  որոնք յաճախ շահագործուած եւ արհամարհուած են զօրաւոր նկարագիր ունեցող մարդոց կողմէ:  

Նորին Սրբութիւնը մեկնաբանեց ապա օրուան Սուրբ Գրային ընթերցումը  քաղուած  (Ա. Թագաւորաց)  Գիրքէն ուր կը խօսուի Սամուէլի հօր՝ Եղկանային մասին,  որ ունէր երկու կին՝ Աննա եւ Փենանան: Այս վերջինը  փոխանակ մխիթարելու Աննային որ ամուլ էր,  զայն կ՝արհամարհէր եւ կը նուաստացնէր: Ֆրանչիսկոս Պապ դիտել տուաւ որ տկարներու հանդէպ արհամարհանքի  եւ նուաստացումին պատմութիւններ շատ կան  Սուրբ Գիրքին մէջ  թուելով զանազան օրինակներ ապա հարց տալով թէ  ի՞նչն է որ մեզ կը մղէ արհամարհելու եւ նուաստացնելու տկարները եւ զանոնք շահագործելու, հաստատեց թէ այս մէկը սատանային գործն է եւ հետեւանքը սկզբնական մեղքին,  ընդգծելով նաեւ,  որ «Սատանան չունի կարեկցութեան հոգի»:

Այս առնչութեամբ Ֆրանչիսկոս Պապ անդրադառնալ տուաւ որ երբ բարի գործ կատարելու փափաք կը զգանք  կ՝ըսենք որ Սուրբ Հոգին է մեզ ներշնչողը,  մինչ  երբ մեր մէջ կը զգանք տկարները արհամարհելու եւ նուաստացնելու փափաքը, այդ չար գործը  կը վերագրենք սատանային:   

Հետեւաբար  հրաւէր ուղղեց Ֆրանչիսկոս Պապ, Տիրոջմէ հայցենք կարեկցութեան շնորհքը: Այդ շնորհքը Աստուծոյ կը պատկանի «Ան որ միշտ կարեկից է մեզի եւ մեզ կ՝օգնէ յառաջ ընթանալու  ըսաւ Սրբազան Հայրը եզրափակելով իր քարոզը:  

 

 

08/01/2018 11:52