2018-01-03 09:09:00

Նախագահ Սերժ Սարգսեանի շնորհաւորական ուղերձը ամանորի եւ Ս. Ծննդեան տօներուն առիթով


Հայաստանի նախագահ Սերժ Սարգսեան ամանորեան տօներուն առիթով հայ ազգին յղեց շնորհաւորական հետեւեալ ուղերձը.

Հայաստանի Հանրապետութեան յարգարժա՛ն քաղաքացիներ,
Սիրելի՛ հայրենակիցներ,

2017 թուականին հրաժեշտ տալուց րոպէներ առաջ ուզում եմ շնորհակալութիւն յայտնել ձեզ: Երախտապարտ եմ Հայաստանի զինուորին ու շինականին, մտաւորականին ու գործարարին, բոլոր-բոլորին` անձնուրաց աշխատանքի, հայրենասիրութեան եւ համբերութեան համար: Այն հաւատը, որ մենք բոլորս ունենք մեր ժողովրդի եւ երկրի ապագայի հանդէպ, թող մեզ ուժ տայ նաեւ նոր տարում:

Այս պահին ընտանիքներով հաւաքուել ենք տօնական սեղանների շուրջ: Բոլորս մտովի ամփոփում ենք անցնող տարին, գոհութիւն յայտնում Աստծուն: Բարեկամութեան եւ հարազատութեան դրական լիցքերով եկէք դիմաւորենք 2018 թուականը:

2017 թուականը հետեւողական աշխատանքի եւ լուրջ ծրագրերի իրագործման տարի էր: Լայնածաւալ փոփոխութիւնների կշռոյթը չի նուազել. աւելին` դրանք աւելի մեծ վճռականութեամբ ենք առաջ մղել: Այն դրական արդիւնքները, որ մենք այս տարի ունեցանք, առաջին հերթին ձե՛ր ձեռքբերումներն են: Եւ դեռ համատեղ շատ անելիքներ ունենք, որպէսզի ամրապնդենք Հայաստանի պետականութեան եւ հասարակութեան հիմքերը:

Մեր յաւակնութիւնները մեծ են, եւ մենք հետեւողական ենք լինելու դրանք իրականացնելիս: Շարունակելու ենք անշեղօրէն պաշտպանել Արցախի իրաւունքները եւ շահերը: Իշխանութիւնների աշխատանքը պէտք է զգալի եւ շօշափելի լինի Հայաստանի իւրաքանչիւր քաղաքացու համար, պէտք է բոլորիս վստահութեան զգացում հաղորդի: Մենք հրաշալի երկիր ունենք, եւ պէտք է հպարտ լինենք այսպիսի երկրի քաղաքացի լինելու հանգամանքով:

Սիրելի՛ հայրենակիցներ,

2017 թուականին ընտրեցինք նոր Ազգային ժողով: Քաղաքական մրցապայքարը թէժ էր, սակայն մթնոլորտը կառուցողական էր: Խուսափեցինք թշնամանքից եւ հակադիր ճամբարների բաժան-բաժան լինելուց: Դա աւելի կարեւոր է, քան այն, թէ ո՛վ քանի տոկոս հաւաքեց: Սա եւս մէկ առողջ միտում է, որն անցնող տարուց պէտք է տեղափոխենք նոր տարի: Փոխադարձ յարգանքը, հանդուրժողականութիւնը եւ համերաշխութիւնը այսուհետ պէտք է լինեն Հայաստանի քաղաքական կեանքի մշտական ուղեցոյցները:

Գալիք տարի աւարտին կը հասցնենք կառավարման նոր կարգի անցնելու մեր աշխատանքները: Ուշագրաւ զուգադիպութեամբ 2018 թուականին տօնելու ենք Հայաստանի Հանրապետութեան հիմնադրման 100-րդ տարեդարձը: Վստահութեամբ կարող ենք պնդել, որ այս յոբելեանին մօտենում ենք աւելի ամուր եւ կայացած պետական-հասարակական կառոյցներով:

Միասին Հայաստան ենք վերադարձնելու երկրից հեռացած մեր հարազատներին: Նրանք գալու են, քանի որ Հայաստան հայրենիքում աշխատելու եւ իրենց դրսեւորելու աւելի մեծ ասպարէզ են տեսնելու: Մեր աշխատանքի նպատակը մէկն է` բացել նոր հորիզոններ եւ հնարաւորութիւններ, ստեղծել գործունէութեան լայն դաշտ Հայաստանի իւրաքանչիւր քաղաքացու համար:

Սիրելի՛ հայրենակիցներ,

2017 թուականին նոր զարկ ենք տուել մեր զինուած ուժերն ամրապնդելու գործին: Իրականացուող փոփոխութիւնների արդիւնքում զաւակին բանակ ուղարկող ծնողները պէտք է վստահ լինեն, որ նա ծառայում է գերազանց կազմակերպուածութիւն եւ բացառիկ կարգուկանոն ունեցող զինուած ուժերում:

Մեր զինուորականներին եկէք մաղթենք բարի ծառայութիւն: Եկէք նրանց երախտագիտութիւն յայտնենք մեր անդորրը պաշտպանելու համար:

Եւս մէկ տարի է գումարւում Հայաստանի հազարամեակների անցեալին եւ մեր երիտասարդ անկախ պետականութեան պատմութեանը: Թող 2018 թուականին շարունակի ամրապնդուել Հայաստան-Արցախ-սփիւռք եռամիասնութիւնը, անառիկ լինեն մեր սահմանները եւ հիւրընկալ` մեր օճախները:

Եկէք միասին բաժակ բարձրացնենք եւ խաղաղութիւն մաղթենք մեր Հայաստան աշխարհին, ջերմութիւն եւ ամրութիւն հաղորդենք մեր ընտանիքներին: Եւ միշտ յիշենք, որ մեր պետութեան հիմքը ընտանիքն է: Թող միշտ սիրոյ, երջանկութեան, հոգատարութեան եւ փոխըմբռնման մթնոլորտ տիրի մեզնից իւրաքանչիւրի տանը:

Շնորհաւո՛ր Ամանոր եւ Ս. Ծնունդ:








All the contents on this site are copyrighted ©.