ՄԱԿ-ի ընդհանուր ժողովը այսօր պիտի գումարէ յատուկ նիստ մը քննարկելու համար Երուսաղէմի հարցով բանաձեւի նախագիծը: «ՌԻԱ Նովոսթի» կը հաղորդէ, որ այս մասին յայտարարած է ՄԱԿ-էն դիւանագիտական աղբիւր մը:
«Նիստը կը նախատեսուի գումարել հինգշաբթի ժամը 10:00-ին (Լիբանանի ժամանակացոյցով ժամը 17:00-ին)», ըսած է աղբիւրը:
Երեքշաբթի օր ՄԱԿ-ի մէջ Պաղեստինի մնայուն ներկայացուցիչ Ռիատ Մանսուր եւ շարք մը արաբական երկիրներու ներկայացուցիչներ հանդիպում ունեցած են ՄԱԿ-ի Ընդհանուր ժողովի նախագահ Միրոսլաւ Լայչաքի հետ, երբ Միացեալ Նահանգներ վեթոյի ենթարկած են ՄԱԿ-ի Ապահովութեան խորհուրդի բանաձեւը, որ կոչ կ՛ուղղէր` փոխելու Երուսաղէմը Իսրայէլի մայրաքաղաք ճանչնալու ամերիկեան որոշումը:
Երկուշաբթի երեկոյեան Եմէնի եւ Թուրքիոյ ներկայացուցիչները` իբրեւ Արաբական լիկայի եւ Իսլամական համագործակցութեան կազմակերպութեան ներկայացուցիչներ, ՄԱԿ-ի Ընդհանուր ժողովի նախագահին պաշտօնական դիմում ուղարկած է Երուսաղէմի հարցով յատուկ նիստ գումարելու համար:
«Ռոյթըրզ» լրատու գործակալութիւնը աւելի ուշ հաղորդեց, որ Միացեալ Նահանգներու նախագահ Տանըլտ Թրամփ յայտնած է, որ պիտի հետեւի ՄԱԿ-ի Ընդհանուր ժողովի ընթացքին Երուսաղէմի բանաձեւին քուէարկութեան եւ կ’ողջունէ ՄԱԿ-ի մէջ Միացեալ Նահանգներու մնայուն ներկայացուցիչ Նիքի Հէյլիի բանաձեւին թեր քուէարկելու մտադիր երկիրներուն յղած այն պատգամը, թէ Միացեալ Նահանգներու նախագահը կը սպառնայ բանաձեւին թեր քուէարկող երկիրներուն ամերիկեան օժանդակութիւնները դադրեցնել:
All the contents on this site are copyrighted ©. |