Վատիկանեան Պատուիրակութիւն մը կը մասնակցի Ս. Անդրէասի տօնի արարողութեան։

(Ռատիօ Վատիկան) Այսօր Եկեղեցին կը յիշատակէ Սուրբ Անդրէասի տօնը՝ Կ. Պոլսոյ Եկեղեցւոյ առաքեալը,  որուն առթիւ աւանդութեան համաձայն Վատիկանեան Պատուիրակութիւն մը կը մեկնի Իսթանպուլ, իր մասնակցութիւնը բերելու  Կ. Պոլսոյ Տիեզերական Պատրիարքի վերոնշեալ տօնակատարութեան առթիւ նախագահած արարողութեան։ Վատիկանեան պատուիրակութիւնը, որ իր հետ կը տանի Ֆրանչիսկոս Պապին յատուկ մէկ պատգամը, կը գլխաւորէ Կարդինալ Քիւրդ Քոխը՝ Քրիստոնեաներու միութեան խթանումի Քահանայապետական խորդուրին նախագահը։

Նշենք թէ սոյն համամիութենական այցելութիւնը ապա կը փոխանակուի 29 յունիսին՝ Սուրբ Պետրոս առաքելապետի տօնին օրը, եւ այդ առթիւ Կ. Պոլսոյ պատրիարքութենէն պատուիրակութիւն մը կը ժամանէ Վատիկան ու կը մասնակցի Սուրբ Պետրոսի տօնին առթիւ նախատեսուած արարողութիւններուն։

Կ. Պոլսոյ Պատրիարքին յանձնուած Քահանայապետին պատգամին մէջ, Նորին Սրբութիւնը գրած է. «Նոյնիսկ եթէ հեռու եմ Հռոմէն Միանմար եւ Պանկլատէշ կատարած առաքելական ճամբորդութեանս բերումով, կ՛ուզեմ իմ եղբայրական շնորհաւորութիւնս փոխանցել ձեզի՝ Ձերդ Սրբութիւն ու Սուրբ Սիւնհոդոսի անդամներուն, կղերին, կրօնաւորներուն ու բոլոր հաւատացեալներուն որոնք Սուրբ Գէորգի Պատրիարքարան եկեղեցւոյ մէջ համախմբուած են յիշատակելու համար Սուրբ Անդրէասի տօնը՝ Սիմոն Պետրոս առաքեալի եղբայրը, Կ. Պոլսոյ եւ Տիեզերական Պատրիարքութեան պաշտպան սուրբը»։

«Երբ սարկաւագը հրաւիրէ հաւատացեալները աղօթելու անոնց որոնք ճամբորդութեան մէջ են կը խնդրեմ որ զիս ալ յիշէք այդ աղօթքին մէջ» գրած է ապա Քահանայապետը պատգամին մէջ  ակնարկելով աւանդութիւն դարձած երկու եկեղեցիներու միջեւ համամիութենական այցելութեան ապա մատնանշեց երկու եկեղեցիներու միջեւ միութեան գործընթացքին, ընդգծելով այդ միութեան կարեւորութիւնը յատկապէս անդրադառնալով 40 տարիներ առաջ ՝ 25 յուլիս 1967-ին Պօղոս Զ Քահանայապետի՝ Սուրբ Անդրէասի տօնի արարողութեան մասնակցութեան ու այդ առթիւ Աթենակորա Պատրիարքին արտասանած խօսքին որուն մէջ Պատրիարքը հրատապ հրաւէր ուղղեց միանալու։

Ֆրանչիսկոս Պապ ապա շնորհակալութիւն յայտնեց Պատրիարքին՝ կաթողիկէ եւ օրթոտոքս եկեղեցիներու միջեւ աստուածաբանական երկրախօսութեան միջազգային խառն յանձնախումբի հաւաքը Լերոսի մէջ հիւրընկալած ըլլալուն համար ու քաջալերեց  այդ աստուածաբանական երկխօսութիւնը որ յատուկ օրէն քննարկումի ենթարկած է Հռոմի Եպիսկոպոսի դերակատարութիւնը։ «Այս պարտականութիւնը պէտք է հետապնդուի ամէնէն առաջ հնազանդելով Սուրբ Հոգիին՝ Եկեղեցւոյ վերապահած  կարիքներուն» գրած է ապա Քահանայապետը պատգամին մէջ որուն աւարտին ակնարկեց աշխարհի ու յատկապէս Միջին Արեւելքի իրադարձութիւններուն ու այդ իրադարձութիւններէն բխող երկուստեք մտահոգութեան, յոյս յայտնելով որ կաթողիկէներ եւ օրթոտոքսներ կարողանան միասնական յանձնառութեամբ գործել ի նպաստ հասարակաց բարիքին, ապա պատգամը եզրափակեց վստահեցնելով իր աղօթքները ու իր ջերմ զգացումները։