Հայաստանի Հանրապետութեան երկու օդակայաններուն ուղեւորահոսքը 2017 թուականի Յունուար-Օգոստոս ամիսներուն կազմած է 1 667 173 մարդ, որ 25.4 տոկոսով աւելի է նախորդ տարուան նոյն ամիսներուն համեմատ:
Այս մասին կը յայտնեն Հայաստանի կառավարութեան առընթեր քաղաքացիական օդանաւային գլխաւոր վարչութեան մամուլի ծառայութենէն:
Օգոստոսին Հայաստանի երկու օդակայաններուն մէջ ուղեւորահոսքը կազմած է 293 317 մարդ` 2016-ի նոյն ամսուան ցուցանիշը գերազանցելով 14.9 տոկոսով:
2017-ի Օգոստոս ամսուն Երեւանի «Զուարթնոց» օդակայանի ուղեւորահոսքը կազմած է 281 345 մարդ` 10.2 տոկոսով գերազանցելով նախորդ տարուան Օգոստոս ամսուան ցուցանիշը:
2017-ի Յունուար-Օգոստոս ամիսներուն, 2016-ի նոյն ամիսներու հետ համեմատած, «Զուարթնոց» օդակայանին մէջ արձանագրուած է ուղեւորահոսքի 21.9 տոկոս աճ:
«Զուարթնոց» օդակայանին մէջ 2017 թուականի Յունուար-Օգոստոս ամիսներուն բեռնափոխադրումը կազմած է 14 985 թոն ապրանք, որ 54 տոկոսով կը գերազանցէ 2016-ի նոյն ժամանակահատուածի ցուցանիշը:
2017-ի Օգոստոս ամսուն Գիւմրիի «Շիրակ» օդակայանի ուղեւորահոսքը կազմած է 11 972 մարդ:
«Շիրակ» օդակայանին մէջ 2017 թուականի Յունուար-Օգոստոս ամիսներուն ուղեւորահոսքը կազմած է 56 243 մարդ` նախորդ տարուան նոյն ժամանակահատուածին կազմելով 7 065 մարդ:
«Զուարթնոց» եւ «Շիրակ» օդակայաններուն մէջ 2017 թուականի Յունուար-Օգոստոս ամիսներուն, նախորդ տարուան նոյն ամիսներու հետ համեմատած, 22.1 տոկոսով աճած են նաեւ թռիչք-վայրէջքները:
All the contents on this site are copyrighted ©. |