Ընկերային ցանցեր:

RSS:

Ռատիօ Վատիկան

Քահանայապետի եւ Եկեղեցւոյ ձայնը աշխարհի հետ երկխօսութեան մէջ

Լեզու:

Եկեղեցի \ Եկեղեցական

Մխիթարեան Ս. Ղազար Մայրավանքի Վենետիկ հաստատման 300 ամեակ - Հաղորդագրութիւն

Ս. Ղազար Մխիթարեան Մայրավանք

08/09/2017 10:10

Այս տարի, Մխիթարեան Միաբանութիւնը պաշտօնապէս կը նշէ երեքհարիւրամեակը Մխիթարեան Մայրավանքի հաստատման Վենետիկ, Ս. Ղազարու Հայոց Կղզիին վրայ:

Ինչպէս ծանօթ է, 1700 թուականին, Պոլսոյ մէջ, Մխիթարեան Միաբանութեան հիմնադրումէն յետոյ, Մխիթար Սեբաստացի Աբբահայրը հարկադրուեցաւ ապաստանիլ, նախ Մեթոն (Պեղոպոնէս), Վենետիկի հասարակապետութեան տիրապետութեան ներքեւ, եւ ապա, 1715-ին, Վենետիկ, ուր 1717-ին հաստատուեցաւ Ս. Ղազար կղզիին վրայ, այստեղ կառուցելով իր մենաստանը վանական համալիրով, որ այն օրէն համայն հայութեան համար դարձաւ հոգեւոր եւ մշակութային վերածնունդի փարոս եւ կարեւորագոյն առաջաւոր կեդրոններէն մէկը:

Ընթացիկ տարւոյս 8 Սեպտեմբերին, որ յիշատակի օրն է Ս. Ղազար Կղզի մուտքին՝ Մխիթարի եւ իր հետեւորդ առաջին աշակերտներուն, Մխիթարեան Միաբանութիւնը հանդիսապէս սկիզբը կը յայտարարէ առաջիկայ բացառիկ դարադարձի տօնակատարութիւններուն:

Այս բարեբաստիկ առիթով նախատեսուած են հետեւեալ հանդիսութիւնները.

- Ուրբաթ 8 Սեպտեմբեր:
- Սուրբ եւ անմահ Պատարագ Ս. Ղազարու եկեղեցւոյ մէջ, (ժամը՝ 11.00-ին)

- Շաբաթ 9 Սեպտեմբեր:
- Տես մշակութային հիմնադրամը եւ Մխիթարեան Միաբանութիւնը կը ներկայացնեն «Մխիթար Սեբաստացի» փաստա-վաւերագրական ֆիլմը: Առաջին ցուցադրութիւնը տեղի կ՚ունենայ 2017 Սեպտեմբեր 9-ին, Վենետիկի Մուրատ Ռափայէլեան վարժարանի Հայելիներու դահլիճին մէջ ժամը 16:00-ին

- Երեկոյեան ժամերգութիւն հայածէս արարողակարգով, Վենետիկի Ս. Մարկոս Տաճարին մէջ (ժամը՝ 18.00-ին, մասնակցութեամբ Վենետիկի Պատրիարք, Գերշ. Ֆրանչեսկոյ Մորալիայի - Francesco Moraglia)

- Կիրակի 10 Սեպտեմբեր:
- Սուրբ եւ անմահ Պատարագ Ս. Ղազարու եկեղեցւոյ մէջ, հանդիսապետութեամբ Գերշ. Լեւոն Արք. Զէքիեանի, Քահանայապետական Պատուիրակ Մխիթարեան Միաբանութեան (ժամը՝ 11.00-ին)

- Հանդիսաճաշ Մայրավանքի սեղանատան մէջ (ժամը՝ 13:00-ին)

- Պատմավաւերագրական ցուցահանդէսի բացում՝ Մայրավանքի հիմնարկութեան եւ պատմութեան մասին (ժամը՝ 15.30-ին)

- Հայ հոգեւոր եւ ժողովրդական երգերու համերգ (Ensemble Gaspard Edesse, ղեկավարութեամբ Ժուստին Ռափաչչիոլիի - Justine Rapaccioli): (ՇԵՐԱՄ անսամբլ, Արամ Իփէքճեան, Դուդուկ. Sheram Ensemble, Aram Ipekdjian, Duduk), Մայրավանք Ս. Ղազարու եկեղեցւոյ մէջ (ժամը 17:30-ին) :

Մեզի համար մեծապէս հաճելի եւ ուրախ պիտի ըլլայ վայելել Ձեր ներկայութիւնն ու մասնակցութիւնը վերոյիշեալ նախաձեռնութիւններուն:

Յամենայն դէպս կ՚ուզէինք Ձեր ազնիւ ուշադրութեան յանձնել, որ 2017-2018 երկարող բովանդակ տարեշրջանը պիտի նուիրուի երեքհարիւրամեակի յիշատակութեան: Լիայոյս ենք որ այս ժամանակամիջոցի ընթացքին պիտի կարենանք հիւրընկալել Ձեզ Մայրավանքիս յարկին տակ, միասնաբար նշելու այս յոբելեանը եւ ըստ արժանւոյն գնահատելու այս լոյսի օճախի սպասարկուները, որոնք ապրեցան ու տքնեցան ի սէր Աստուծոյ եւ մեր պաշտելի Հայրենիքին:

08/09/2017 10:10