Արցախի մէջ տնտեսական աշխուժութեան ցուցանիշը աճած է 15 առ հարիւրով

Ըստ Ազգային վիճակագրական ծառայութեան տուեալներուն, յունիս 2017-ին տնտեսական աշխուժութեան ցուցանիշը յունիս 2016-ի համեմատ կազմած է 113,9 առ հարիւր, մայիս 2017-ի համեմատ` 142,5 առ հարիւր, իսկ յունուար-յունիս 2017-ին (աճողական) յունուար-յունիս 2016-ի համեմատ` 115,0 առ հարիւր:

Յունուար-յունիս 2017-ին Արցախի Հանրապետութեան համախառն ներքին արդիւնքը կազմած է 102,2 միլիառ դրամ` յունուար-յունիս 2016-ին 87,7 միլիառ դրամին փոխարէն: Համախառն ներքին արդիւնքի յաւելաճին ընթացքը կազմած է 14,9 առ հարիւր:

Յունուար-յունիս 2017-ին, մէկ հոգիին հասնող համախառն ներքին արդիւնքը, ընթացիկ գիներով, կազմած է 699,8 հազար դրամ, 1444,2 տոլար կամ 1333,3 եւրօ:

Համախառն ներքին արդիւնքի արձանագրուած 14,9 առ հարիւր յաւելաճին շուրջ 6,0 տոկոսային կէտը ապահոված է հանքագործական արդիւնաբերութիւնը եւ բացահանքերու շահագործումը, 2,6 տոկոսային կէտը` ելեւմտական եւ ապահովագրական գործունէութիւնը,  2,4 տոկոսային կէտը` շինարարութիւնը, 2,1 տոկոսային կէտը` ելեկտրականութեան, կազի, գոլորշիի եւ լաւորակ օդի մատակարարումը: