Սուրիական տագնապին եւ աւերիչ պատերազմին հետեւանքով վնասուեցան գերեզմանատուներ, որոնց կարգին է հայոց Ազգ. գերեզմանատունը: Ընկալեալ սովորութեամբ եւ ծիսական աւանդութեամբ, երբ եկեղեցի մը պատերազմի պայմաններու մէջ կը յայտնուի եւ անվայել ու ահաբեկչական վայրագութեանց կ՛ենթարկուի, անհրաժեշտ կը դառնայ անոր վերաօծումը, ինչպէս որ անհրաժեշտ դարձաւ վերադասաւորումը եւ վերաշինութիւնը գերեզմանատան:
Հովանաւորութեամբ Բերիոյ Հայոց Թեմի Առաջնորդ Գերշ. Տ. Շահան Սրբ. Արք. Սարգիսեանի, Չորեքշաբթի, 9 Օգոստոս 2017-ի առաւօտուն եկեղեցական դասը, յաւուր պատշաճի զգեստաւորուած, քահանայ հայրերու եւ «Շողակաթ»ի դպրուհիներու ու հաւատացեալներու ներկայութեան, «Ուրախ Լեր» շարականի երգեցողութեամբ, թափօրով ուղղուեցաւ դէպի մատրան դասը: Առաջնորդ Սրբազան Հայրը եկեղեցւոյ դասին մէջ կանգնած «Մայր Մաշտոցէն» հերթաբար կարդաց սուրբ գրային հատուածներ եւ Սաղմոսներ, ապա շարականներ հնչեցին: Առաջնորդ Սրբազան Հայրը կատարեց խորանի եւ Ս. Սեղանի լուացումն ու օծումը (ջուրով, գինիով եւ Ս. Միւռոնով):
Օծման հանդիսաւոր արարողութենէն ետք, սրբագործուած մատրան մէջ Անդրանիկ Ս. Պատարագ մատուցեց Արժ. Տ. Եզնիկ Քհնյ. Զղջանեան, յընթացս Ս. եւ Անմահ Պատարագին Առաջնորդ Սրբազան Հայրը արտասանեց յուզումնախառն իր հոգեւոր խօսքը: Սրբազանը ըսաւ «Գոհութիւն եւ փառք կը վերառաքենք Աստուծոյ, որ մեզ այս առաւօտ արժանի դարձուց հաւատքի խորհուրդը մարմնաւորողայս մատուռը վերաօծելու: Երկար ընդմիջումէ ետք, այսօր, պատերազմի, բռնութեան օրերը անցած են, մենք օրհնուեցանքեւ հաւաքական աղօթքի ճամբով վերստին օծեցինք մեր սրբապղծուած այս մատուռը, որպէսզի մեր ժողովուրդի զաւակներըկարենան աղօթք բարձրացնել մեր սիրելի ննջեցեալներու հոգիներուն փրկութեան համար:
Այսօր Ս. Հռիփսիմէ այս մատուռը նաեւ «Ս. Յարութիւն» անունով կնքեցինք, որպէս վկայութիւն յարուցեալով ապրելու եւյայտարարելու, որպէս ոգիի ստեղծագործութեան գեղեցիկ արտայայտութիւն: Ան նաեւ գեղեցկագոյն յուշարձանն էանոնց, որոնք դարձան զոհը եւ նահատակուեցան ահաւոր պատերազմին:
Անցնող տարիներուն հալէպահայութիւնը բազմաթիւ կորուստներ ունեցաւ ոգեղէն, հոգեղէն եւ նիւթական, սակայն անորհաւատքը բնաւ չտկարացաւ»:
Առաջնորդ Սրբազան Հայրը իր պատգամի աւարտին գնահատական խօսք ուղղեց բոլոր անոնց, որոնք որեւէ ձեւով աջակցեցան Ազգ. Գերեզմանատան վերականգնումի աշխատանքներուն:
Սրբազան Հայրը խաղաղութեան աղերս բարձրացուց առ Աստուած` հայցելով որ Քրիստոսի սէրն ու խաղաղութիւնը սփռուի ամբողջ աշխարհին, ու մանաւանդ Սուրիական Հայրենիքին, եւ Աստուծոյ լոյսը լուսաւորէ համայն մարդկութեան միտքը եւ հոգին, որպէսզի մնայուն խաղաղութիւն եւ վերականգնում տեղի ունենայ Սուրիական Հայրենիքին մէջ:
Ս. Պատարագի աւարտին Առաջնորդ Սրբազան Հօր նախագահութեամբ կատարուեցաւ հաւաքական հոգեհանգստեան արարողութիւն Սուրիոյ նահատակներուն եւ ազգիս համօրէն ննջեցելոց:
Վերաօծման արարողութիւնը աւարտեցաւ Աստուծոյ ողորմութեամբ, հաւատացեալներու յուզումնախառն եւ բերկրալից ապրումներուն ներքեւ:
Այստեղ իբրեւ կարեւոր տեղեկանք կ՛արձանագրենք մատրան պատմութիւնը:
Հալէպի Ազգ. Գերեզմանատան հիւսիս արեւմտեան կողմը կը գտնուի Ս. Հռիփսիմէ մատուռը, որուն պաշտօնական հիմնարկէքը կատարուած է 30 Դեկտեմբեր 1962-ին, նախագահութեամբ օրուան Առաջնորդ Ղեւոնդ Արք. Չէպէեանի, իսկ կառուցուած է 1970-ին արդեամբ հալէպահայ Գարեգին Եղիայեանի: Մատուռը վերանորոգուած է 1988-1989-ին:
Յիշատակն արդարոց օրհնութեամբ եղիցի:
All the contents on this site are copyrighted ©. |