Գոյութիւն ունի Յիսուսի Սուրբ Սրտի այսպէս կոչուած տասներկու խոստումների մի ցանկ, որի կազմողի անունը յայտնի չէ, բայց, ըստ աւանդութեան, այդ ցանկը հիմնուած է Փրկչի կողմից Սուրբ Մարգարիտա Մարիա Ալակոկին տրուած յայտնութիւնների վրայ: Այդ խոստումների տեքստը վստահելի է, քանի որ դրանցում արտայայտած են սրբուհու գրառումները:
Ահա և ցանկը, որին մենք աւելացրել ենք յղումներ սուրբ Մարգարիտա Մարիայի տեքստերից.
Իմ Սուրբ Սիրտը պաշտողներին Ես՝ համաձայն նրանց կեանքի հանգամանքներին, տալիս եմ անհրաժեշտ շնորհներն ու օգնութիւնը (Նամակ №141):
Նրանց ընտանիքներում Ես կհաստատեմ ու կպահպանեմ խաղաղութիւն (Նամակ №35):
Ես կմխիթարեմ նրանց ցանկացած վշտի մէջ (Նամակ №141):
Ես նրանց համար կլինեմ ապահով ապաստան, յատկապէս մահուան ժամանակ (Նամակ №141):
Ես առատ օրհնութիւններ կբաշխեմ նրանց բոլոր աշխատանքներին և նախաձեռնութիւններին (Նամակ №141):
Մեղաւորները Իմ Սրտի մէջ կգտնեն անսահման ողորմածութիւն (Նամակ №132):
Շնորհիւ բարեպաշտութեան այս ձևի՝ գաղջ (անտարբեր) հոգիները կդառնան նախանձախնդիր (Նամակ №132):
Նախանձախնդիր հոգիները արագ կհասնեն կատարելիութեան բարձունքների (Նամակ №132):
Իմ օրհնութիւնը կլինի այնտեղ, որտեղ կպաշտեն Սուրբ Սրտի կերպարը (Նամակ №135):
Բոլոր նրանց, ովքեր աշխատում են հոգիների փրկութեան համար, Ես տալիս եմ ամենակարծր հոգիները դարձի բերելու շնորհ (Նամակ №141):
Նրանց անունները, ովքեր տարածում են բարեպաշտութեան այս ձևը, ընդմիշտ կդրոշմուեն Իմ Սրտում (Նամակ №141):
Բոլոր նրանց, ովքեր ինն ամիս շարունակ առաջին ուրբաթ օրերին կհաղորդուեն Իմ Մարմնին և Արեանը, Ես տալիս եմ հաւատը մինչև վերջ պահպանելու և յաւիտենական փրկութիւն ձեռք բերելու շնորհ (Նամակ №86):
Յաղթանակի խոստումը
Սուրբ Սրտի յայտնութիւնը աւարտւում է Նրա թշնամիների նկատմամբ վերջնական յաղթանակի ոգեշնչող խոստումով:
Մարգարիտա Մարիան բողոքում էր, որ բարեպաշտութեան այս ձևի տարածման ճանապարհին նա չի հասկացուել, ծաղրուել է, հանդիպել է խոչընդոտների, ոմանք էլ նրան համարել են խաբեբայ կամ մոլագար: Այդ ժամանակ էլ Յիսուսը սփոփել է նրան՝ մարգարէական խօսքերով.«Մի՛ վախեցիր, Ես կթագաւորեմ՝ չնայած Իմ թշնամիների ջանքերին»: Սուրբը իր ինքնակենսագրականի մէջ պարզաբանում է. «Դա ինձ շատ մխիթարեց, քանի որ, ես Նրան թագաւոր տեսնելուց բացի ոչինչ չեմ ուզում: Դրա համար էլ ես կպաշտպանեմ Նրա գործերը, ես հաւատում են միայն Իրեն»: Միւս նամակներում տեսիլքի ականատեսը (մատնանշում) ընդգծում է ստացուած խոստումը. «Նա կթագաւորի՝ չնայած Իր թշնամիներին: Նա կլինի մարդկային սրտերի Աստուած և Տէր»: «Աստուածային Սիրտը կթագաւորի, չնայած բոլոր նրանց, ովքեր հակառակուում են Իրեն: Սատանան և իր բոլոր հետևորդները կանարգուեն, կանիծուեն»:
Իր Սուրբ Սիրտն ներկայացնելով Սբ. Մարգարիտա Մարիա Ալակոկին (1647-1690) Յիսուսն ասաց. «Ահա՝ Սիրտը, որը այդքան սիրեց մարդկանց և չխնայեց իրեն մինչև վերջ…..Իսկ փոխարէնը մեծամասնութիւնից այն ստանում է միայն ապերախտութիւն…անարգանք և սրբապղծութիւն, անտարբերութիւն և արհամարհանք…»: Իր չորս տեսիլքներում սբ. Մարգարիտա Մարիա Ալակոկին Յիսուսը թողեց Իր խոստումները բոլոր նրանց, ովքեր կպատուեն Իր Սուրբ Սիրտը:
Պատրաստեց՝ Նաիրա Բաղդասարյանը։
Քաղուած armenianchurchco.com կայքէջէն։
All the contents on this site are copyrighted ©. |