Ընկերային ցանցեր:

RSS:

Ռատիօ Վատիկան

Քահանայապետի եւ Եկեղեցւոյ ձայնը աշխարհի հետ երկխօսութեան մէջ

Լեզու:

Եկեղեցի \ Եկեղեցին հայկական

Ծիսական գիտելիքներ Բ. Կիրակի Զկնի Պենտեկոստէի- Տօն Եկեղեցւոյ (18-25 Յունիս 2017)։

Մոմերու լուսանկար

19/06/2017 09:48

Յետ Յինանց շրջանին, ահա կը սկսինք սուրբերու յիշատակութեան շրջանը, եւ այս շաբթուայ սուրբերը կը սկսին Քրիստոսի ծնունդէն, այսինքն Բեթղեհէմի անմեղ մանուկներէն, որոնք եղան առաջին վկաները Քրիստոսի, թէեւ փոքր մանուկներ էին եւ տակաւին Քրիստոսի անունն իսկ լսուած չէր աշխարհի վրայ. Սակայն անոնք զոհուեցան յանուն Քրիստոսի, Հերովդէս թագաւորի կողմէ, որ տեսնելով թէ մոգերը չվերադարձան Երուսաղէմ, իրեն բերելու լուրը թէ ուր կը գտնուէր Յիսուս Մանուկը եւ որպէսզի ապահով ըլլար թէ նորածին թագաւորը` Յիսուսը պիտի մեռնէր, սպաննել տուաւ Բեթղեհէմի բոլոր նորածին մանուկները, մինչեւ երկու տարեկան։

Անոնց հետ` հայ Եկեղեցին կը տօնէ նաեւ Ակակիոս անունով վկայ մը որ Ամասիոյ մէջ նահատակուած է 310 թուականին. Պատճառը որուն համար կը տօնուի Բեթղեհէմի անմեղ մանուկներուն հետ այն է որ երբ զինք գլխատեցին, ըստ վկաներուն` անոր վէրքէն արիւն եւ կաթ վազեց։

Երեքշաբթի օր`20 Յունիսին կը տօնենք երկու կոյսեր Հռիփսիմեանց խումբէն, որոնց անուններն են Նունէ եւ Մանէ։ Նունէ, խումբը թողլով` մեկնած էր դէպի Վրաստան եւ հոն քարոզած էր աւետարանը, ապա բժշկած էր թագուհին եւ զաւակը, իսկ Միհրան թագաւորը ազատած էր, փրկելով զինք կորուստէ երբ, որսի ժամանակ, թանձր մշուշ մը պատած էր ամէն կողմ։ Վրացիները կ՛ընդունին Նունէն որպէս իրենց Լուսաւորիչը. Հետագային` սրբուհին կապ պահած էր Սուրբ Գրիգորի հետ, նամակ մը ուղարկելով իրեն, որուն մէջ կը խնդրէր որ առաքեալներ ուղարկուին նաեւ Վրաստան։ Ապա ճգնութեամբ աւարտած էր իր կեանքը։

Իսկ Մանէ, արդէն խումբը թողած էր երբ կ՛անցնէին Դարանաղեաց գաւառէն եւ Սեպուհ լերան վրայ ճգնած էր իր բոլոր կեանքի մնացած օրերը, մինչեւ իր մահուընէ քանի մը օր առաջ, երբ ձորին մէջէն լսեց ձայնը Սուրբ Գրիգոր Լուսաւորչին որ յաջողած էր գտնելու իր ճգնութեան վայրը. Սրբուհին 3 օր խնդրեց Գրիգորէն, զինք ընդունելու պատրաստութիւն տեսնելու համար. Բայց երբ մօտը հասաւ, արդէն ան վախճանած էր։ Յիշենք որ Նունէ եւ Մանէ Հռովմայեցի կոյսեր էին։

Հինգշաբթի օր՝ 22  Յունիսին, տօնն է երկու ուրիշ Հռովմայեցի իշխաններու, Սարգիս եւ Բագոս, որոնք մերժելով զոհել կուռքերուն, անարգուեցան եւ ապա նահատակուեցան Մաքսիմիանոս կայսեր օրով։ Այս Սարգիսը տարբեր է Սուրբ Սարգիս զօրավարէն որ ապրած է չորրորդ դարուն եւ Յուլիանոս ուրացողի շրջանին, Պարսից թագաւորին կողմէ նահատակուած իր  որդւոյն՝ Մարտիրոսի հետ։

Շաբաթ օրը՝ 24  Յունիսին, կը տօնենք Մովկիմոս քահանան որ նոյնպէս մարտիրոսացած է իր հաւատքին համար, Մակեդոնիոյ Ամփիպոլիս քաղաքին մէջ։ Անոր հետ կը տօնենք նաեւ Կոդրատիոս Նիկոմիտիացի զինուորականը որ նահատակուեցաւ 257-ին իր քրիստոնէական հաւատքին համար։

Կիրակի 25  Յունիսը՝  Գ. կիրակին զկնի Պենտեկոստէի, բարեկենդան՝ Ս. Գրիգոր Լուսաւորիչի տօնին (Գիւտ  նշխարաց տօնին).

 

19/06/2017 09:48