2017-05-26 13:00:00

Գերապայծառ Անճելօ Տէ Տոնաթիսը կը դառնայ Հռոմի թեմի Քահանայապետի նոր տեղակալը։


(Ռատիօ Վատիկան) Ուրբաթ` 26 Մայիս 2017-ին, Ֆրանչիսկոաս Սրբազան Քահանայապետը, ի տես Հռոմի Թեմի ընդհանուր տեղակալ  Արքեպիսկոպոս` Կարդինալ Վալլինիի, տարիքի բերումով, ներկայացուցած հրաժարականին, անոր տեղ անուանեց գերապայծառ Անճելօ Տէ Տոնաթիսը, որ մինչեւ օրս կը վարէր` Հռոմի Թեմի Արքեպիսկոպոսի օգնական եպիսկոպոսի պաշտօնը։

Գերապայծառ Տէ Տոնաթիս ծնած է 1954-ին, Նարտօ - Կալլիփոլի թեմին պատկան Քազարանօ գիւղաքաղաքին մէջ։ Նախնական ուսումները ստացած է Թարանթօ քաղաքի նորընծայարանին մէջ, ապա փիլիսոփայական ու աստուածաբանական ուսումները աւարտած է` Լատերանի ու Գրիգորեան Քահանայապետական համալսարաններուն մէջ։

Քահանայ ձեռնադրուած է 12 ապրիլ 1980-ին։ Իր ստանձնած պաշտօններու շարքին Գերապայծառ Տէ Տոնաթիս եղած է նաեւ Կարդինալական Դասի քարտուղարութեան Արխիւիստ հուսկ` Հռոմի թեմի կղերի գրասենեակի տնօրէն։

2014-ին Հայր Տէ Տոնաթիս Քարոզեց Հռոմի Քուրիայի քառասնորդացի Հոգեւոր Կրթութիւնը  ապա 14 սեպտեմբեր 2015-ին նշանակուեցաւ  որպէս  Հռոմի թեմի օգնական Եպիսկոպոս։








All the contents on this site are copyrighted ©.