2017թ. մայիսի 19-ին Հայ Կաթողիկէ Եկեղեցու համայնքներին իր հրաժեշտը տուեց Արհ. Տ. Մարեկ արքեպս. Սոլչինսկին՝ Հռոմի Սրբազան Քահանայապետի արդեն նախկին նուիրակը Հայաստանում, Վրաստանում և Ադրբեջանում: Սոլչինսկին այս պաշտօնը վարեց 5 տարի և հիմա, Քահանայապետի որոշմամբ, նուիրակի պաշտօնը կկատարի Տանզանիայում:
Արհ. Տ. Մարեկ արքեպս. Սոլչինսկին հրաժեշտի Սուրբ Պատարագը մատուցեց Գիւմրիի Սրբոց Նահատակաց հայ կաթողիկէ աթոռանիստ եկեղեցում՝ Հայաստանի, Վրաստանի, Ռուսաստանի հայ կաթողիկէների առաջնորդ Արհ. Տ. Ռաֆայել արքեպս. Մինասեանի, Արհ. Տ. Նշան արքեպս. Գարաքեհեյանի և հայ կաթողիկէ հոգևորականների ներկայութեամբ և համապատարգութեամբ, Գիւմրիի փոխ քաղաքապետ Վաղարշակ Մխիթարեանի Անարատ յղութեան հայ քոյրերի, Հայաստանում և Վրաստանում ծառայող լատին կաթողիկէ վարդապետների, Հայկական Կարիտասի, ամերիկեան բարեգործական CNEWA կազմակերպութեան աշխատակիցների և Գյումրիի ժողովրդապետութեան հաւատացեալների մասնակցութեամբ:
Արքեպիսկոպոս Մարեկ Սոլչինսկին ներկաներին ուղղուած իր խօսքում նախ անդրադարձաւ Ֆրանցիսկոս Սրբազան Քահանայապետի 2016թ. յունիսի 25-ին Գիւմրի այցելության ընթացքում Վարդանանց հրապարակում արտասանած քարոզի շեշտադրութիւններին.
«Քահանայապետի այցը գեղեցիկ խորհրդանիշը եղաւ ձեր համայնքի վերածննդեան: Նա իր Սուրբ Պատարագի մատուցման որպէս նշանաբան ընտրեց Եկեղեցու հոգևոր կեանքի վերակառուցման թեման:
Այս տաճարը, Տաշիրի և միւս հայ կաթողիկէ եկեղեցիները տեսանելի նշաններն են Եկեղեցու վերազարթօնքի: Բայց քրիստոնեայ համայնքի հոգևոր կեանքը վերակառուցելը քարեղէն տաճարներ կառուցելը չէ միայն: Այս մասին շեշտեց Քահանայապետը Գիւմրիում՝ ընդգծելով երեք կարևոր կէտ, որոնք անհրաժեշտ են հոգևոր կեանքը վերակառուցելու և հետագան հանգրուաններն ապահովելու համար՝ յիշողութիւնն, հաւատք, եղբայրասիրութիւն:
Վերակառուցելու համար քրիստոնեայ մի կեանք, որը քանդուել է, նախ պէտք է յիշողութիւն՝ այն վերակենդանացնելու համար, բայց անցեալը յիշելը պէտք է օգնի՝ ներկան հասկանալու և դէպի ապագայ գնալու համար:
Երկրորդ՝ անհրաժեշտ է հաւատքը.Աստուած Ի՛նքն է զօրավիգ կանգնում՝ մեր կեանքը վերակառուցելու համար:
Եղբայրասիրութիւնը՝ ողորմած սէրը.այս կէտի վրայ Պապը յատուկ ուշադրութիւն դարձրեց:
Քրիստոնէական կեանքում քանդման պատճառը բաժանումն է: Համայնքի վերածնունդը կապուած է միութեան, համայնքի անդամների միջև սիրոյ զօդի ստեղծման հետ: Այս միութիւնը ողորմած սիրոյ պտուղն է, որը համայնականները փոխանակում են և փոխադարձաբար տալիս միմեանց…
Սէրը ամենաազդու գործիքն է քրիստոնեայի համար՝ վերականգնելու այն ամենը, ինչ քանդուած է բաժանման հետևանքով:
Ձեզ հրաւիրում եմ ընթանալու առաջ՝ հաւատքով և յոյսով, եղբայրասիրութեամբ:
Շատ դժուար է մարդկային յարաբերութիններում կամուրջներ վերակառուցելը: Բայց մենք ունենք վսեմ մի օրինակ՝ մեր Տէրը և Իր սէրը, որով գնաց մինչ ի մահ.սրա համար է, որ Տէրն ասում է.«Սիրեցէ՛ք միմեանց ինչպէս ես ձեզ սիրեցի»:Իմ կողմից երախտաւորում եմ, որ աղօթելու եմ ձեզ համար ամենուրեք, ուր որ գնամ:
Այս հինգ տարիներին ես առաջին անգամ խոր յարաբերութիւններ հաստատեցի Հայ Եկեղեցու հետ: Այս ժամանակահատուածում կարողացանք ապրել պահեր, որոնք իրօք արտակարգ էին ձեր համայնքի համար: Բաւական է յիշել այս երեք կէտերը, որոնք պատմական էին՝
2015թ. ապրիլի 12-ին Սբ. Պետրոսի տաճարում մատուցուած Սբ. Պատարագը՝ ձեռամբ Սրբազան Քահանայապետի, 2015-ի սեպտեմբերին Գիւմրիի Առաջնորդանիստ տաճարի օծումը և Սրբազան Քահանայապետի այցը Հայաստան և նաև Վրաստան… Ձեր համայնքի հետ այս շփումները անջնջելի հետք են թողել իմ հոգում…»:
Արհ. Տ. Ռաֆայել արքեպս. Մինասեանն իր խօսքում ևս անդրադարձ կատարեց Սրբազան Քահանայապետի՝ Հայաստան կատարած հովուական այցին՝ այն համարելով մի առիթ՝ որպէս հայ Եկեղեցի, մեր շնորհակալութիւնը յայտնելու Ֆրանցիսկոս Սրբազան Քահանայապետին և Ամենայն Հայոց Կաթողիկոսին:
«Ես պէտք է փոխադարձ սիրոյ խօսքեր ասեմ: Սիրելի Սրբազանը ապրեց մեզ հետ, որպէսզի մեր ընթացքը հեշտանայ, որպէսզի մենք կարողանանք լաւագոյն կերպով ներկայանալ և յայտնել մեզ՝ որպէս կաթողիկէ՛ և որպէս հա՛յ: Իր աշխատանքի մէջ մշտապէս կար միասնականութեան նպատակը, որն ինքն ընդհանրապէս լռութեամբ կատարեց, բայց կարողացաւ հարթել, պաշտպանել, օգնել մեզ:
Ուզում եմ շնորհակալութիւն յայտնել Ձեզ՝ Սրբազան, ձեր բոլոր զոհողութիւնների համար:
Կարող եմ վկայել, որ ամենախրթին պահերին և եղբայրասիրական արտայայտութիւններով Սրբազանը կարողացաւ պահպանել եղբայրասիրութիւնը մեր մէջ»: Եւ որպէս եղբայրսիրութիւն գեղեցիկ մի քայլ, Ռաֆայել արքեպս. Մինասեանը հայկական օբսիդիանից պատրաստուած մի սկիհ նուիրեց Մարեկ արքեպս. Սոլչինսկիին:Պապական նուիրակը շնորհակալութիւն յայտնեց բոլոր ներկաներին և ասաց.
«Շնորհակալութիւն՛ն բոլորին, ում հաւատքի շնորհիւ այս համայնքը վերածնուեց: Ձեր սերունդը կրողն եք մի հոգևոր ժառանգութեան, որով պէտք է նեցուկ լինէք Սրբազան Քահանայապետին, ում յոյսը միայն դուք էք: Բոլորս պէտք է գիտակցենք մեր՝ մէկ Եկեղեցու անդամ լինելը»:
Սուրբ Պատարագի վերջում պապական նուիրակը խնդրեց բեմ բարձրանալ նաև Արհ. Տ. Նշան արքեպս. Գարաքեհեյանին և երեք եպիսկոպոսներով միասին իրենց օրհնութիւնը բաշխեցին հաւատացեալներին:
Սուրբ Պատարագի աւարտից յետոյ պապական նուիրակի պատուին կազմակերպուեց ճաշկերոյթ, որին իր մասնակցութիւնը բերեց նաև Գիւմրիի քաղաքապետ Սամվել Բալասանյանը:
Ճաշկերոյթի ժամանակ համերգային ելոյթներով հանդէս եկան Արւեստի վաստակաւոր գործիչ երգիչ Մուրադ Մալխասեանը, Գյումրիի Սրբոց Նահատակաց եկեղեցու երգչախմբի երգչուհի Մերի Մկրտչյանը, երգիչ Կարեն Մայիլյանը:
All the contents on this site are copyrighted ©. |