Եգիպտոսի Հայերը Հայոց Ցեղասպանութեան 102-րդ տարելիցին առիթով արիւն յանձնած են

Իբրեւ խորհրդանշական քայլ` Եգիպտոսի հայկական համայնքի ներկայացուցիչները, Հայոց Ցեղասպանութեան 102-րդ տարելիցին առիթով արիւն յանձնած են: Այս մասին կը հաղորդէ News.am-ը՝ վկայակոչելով Ahram Weekly–ն։

Եգիպտահայերը արիւն յանձնած են Կարմիր կիսալուսին միութեան: Շարժումը  կազմակերպուած է ՀՄԸՄ Արարատ Գահիրէի Սկաուտներուն (HomenetmenArarat Cairo Scouts)  ջանքերով: Նման քայլով՝ հայերը իրենց երախտիքը յայտնած են Եգիպտոսի կառավարութեան ու ժողովուրդին, քանի որ Եգիպտոսը եղած է Ցեղասպանութենէն ետք հայերը ընդունած առաջին երկիրներէն։

Նշենք, որ ժամանակին Եգիպտոսի հայկական համայնքին թիւը կը հասնէր 25 հազարի, սակայն 1952-ի ու 2011-ի յեղափոխութիւններէն ետք, անկայուն իրավիճակին պատճառով, սկսած է արտագաղթ եւ հիմա, երկրին մէջ, մնացած է ընդամէնը 4000 հայ: Անոնք մեծ մասամբ կը բնակին Գահիրէի ու Աղեքսանդրիոյ մէջ: Ունին դպրոցներ, մշակութային ու մարզական ակումբներ, եկեղեցիներ ու թերթեր: