(Ռատիօ Վատիկան) Եգիպտոսի քրիստոնեաները ''Ղպտի'' կոչուեցան արշաւող արաբներու կողմէ եւ տակաւին նոյն անունը կը կրեն մինչեւ օրս:
Ղպտի Եկեղեցին կը համախմբէ Եգիպտոսի քրիստոնեաներու մեծամասնութիւնը, ուր կան նաեւ այլ եկեղեցիներու պատկան փոքրաթիւ հաւատացեալներ։
Ղպտի եկեղեցին հիմնուած է առաջին դարուն` Մարկոս աւետարանիչի քարոզութեան շնորհիւ։ Եկեղեցին բաժնուած է ուղղափառ (մեծամասնութիւն) ու կաթողիկէ եկեղեցիներու։
Ուղղափառ Եկեղեցին ունի իր Պապը ` Թաուատրոս Բ, որուն գահակալութիւնը տեղի ունեցաւ 2012-ի 18 նոյեմբերին եւ որ Ղպտի Եկեղեցւոյ 118-րդ Պատրիարքն է։
Մինչ Ղպտի Կաթողիկէ եկեղեցւոյ ծագումը վերագրուած է Ֆրանչիսկեան ու Քափուչչին միսիոնարներու, որոնք ԺԷ. դարուն առաքելութիւններ հաստատած են Գահիրէի մէջ որոնց յաջորդած է Յիսուսեաններու առաքելութիւնը 1675-ին։
1741-ին Երուսաղէմի Ղպտի եպիսկոպոս մը կ՛անդամակցի Կաթողիկէ Եկեղեցւոյ եւ Պենետիկտոս ԺԴ Քահանայապետը զինք կը նշանակէ որպէս փոքր համայնքի առաքելական կառավարիչ։
1824-ին Սուրբ Աթոռը կը հիմնէ Կաթողիկէ Ղպտիներու Պատրիարքութիւնը ու 1895-ին առաքելական կառավարիչի աթոռը կը դառնայ Պատրիարքական աթոռ։
Իսկ հին եւ նշանաւոր Եգիպտական Եկեղեցիին պատրիարքական աթոռը կը գտնուէր Աղեքսանդրիա եւ անոր իշխանութիւնը կը տարածուէր մինչեւ Եթովպիա:
Ղպտի ծէսը կը գործածէ հին եգիպտական լեզուն եւ նաեւ արաբերէնը:
Կարելի է ըսել որ Ս. Կոյսին պաշտամունքի օրրանը Եգիպտոս եղած է:
Յատուկ նշանակութիւն ունի Ղպտի Եկեղեցւոյ քրիստոնէական վարդապետութեան դպրոցը:
Ս. Կղեմէս Աղեքսանդրացին, Որիգենէս, Ս. Աթանաս, Ս. Կիւրեղ … մշակութային նշանաւոր աւանդութեան մը ներկայացուցիչներ են: ''Աստուածածին'' բառը ծագում առած է Եգիպտոսի մէջ ուր կը գտնուին Ս. Կոյս Մարիամին ուղղուած առաջին աղերսանքները. ''Ով Մայր Աստուծոյ, քու ողորմութեանդ կ՛ապաւինինք: Մի մերժեր կարօտութեանց մէջ քեզի կատարուած մեր պաղատանքները, այլ ազատէ մեզ վտանգէն: Դու միակ անբիծը, միակ օրհնեալը'':
Հոս վանականութիւնը սկիզբ առած է եւ քրիստոնեայ կոյսերը եռանդը գտած են Մարիամի ճամբէն միասին ընթանալու համար:
Ս. Աթանաս կը գրէ անոնց. ''Մարիամի, Աստուածամօր կենցաղը ըլլայ ձեզի՝ բոլորին համար տիպար մը, անոր ձեզմէ իւրաքանչիւրը նմանեցնէ իր սեփական կուսութիւնը: Մարիամի նայելով իբրեւ հայելիի մը, իրեն նման զարդարուեցէք’’:
Աստուածային մայրութեան վարդապետութիւնը Եգիպտոսի մէջ ունի իր մեծագոյն ջատագովները: Հոս Մարիամի մշտնջենաւոր կուսութիւնը կը խոստովանուի սկիզբէն ի վեր:
Եգիպտոսի մէջ շատ կանուխէն զարգացած է ''Մարիամ'' եան նկարչութիւնը եւ ընդունելութիւն գտած են ժողովրդական պատմուածքները։ Բազմաթիւ են այսօր ալ Մարիամի նուիրուած վանքերը եւ եկեղեցիները ''Աստուածամայր եւ Կոյս''-ի փառապանծ միակ տիտղոսին ներքեւ:
All the contents on this site are copyrighted ©. |