Ընկերային ցանցեր:

RSS:

Ծրագիր:

Ռատիօ Վատիկան

Քահանայապետի եւ Եկեղեցւոյ ձայնը աշխարհի հետ երկխօսութեան մէջ

Լեզու:

Աշխարհ \ Միջազգային

Մէյ Եւրոպացիներուն «Պրեքզիթ»-ի հայող բաց նամակ ուղարկած է։

Եւրոպական Միութիւն - REUTERS

31/03/2017 08:09

Բրիտանիոյ վարչապետ Թերեզա Մէյ եւրոպական երկիրներու քաղաքացիներուն ուղարկած է բաց նամակ մը, որուն մէջ ընդգծած է «Պրեքզիթ»-էն ետք Եւրոպական Միութեան հետ յարաբերութիւններու պահպանման կարեւորութիւնը:

«ՌԻԱ Նովոսթի» կը հաղորդէ, որ Մէյ «Այրիշ Թայմզ» օրաթերթին մէջ հրապարակուած իր նամակին մէջ ընդգծած է. «Մենք կը ձգենք Եւրոպական Միութիւնը, սակայն չենք ձգեր Եւրոպան, մենք կ՛ուզենք մնալ հաւատարիմ գործընկեր եւ դաշնակիցներ Իրլանտայի եւ ցամաքամասի մեր բոլոր բարեկամներուն համար»:

Բրիտանիոյ վարչապետը նաեւ նշած է, որ ինք «անձամբ կը պարտաւորուի` ամրապնդելու յարաբերութիւնները Եւրոպական Միութեան հետ»:

Մէյ կը պնդէ. «Ոչ մէկ բան պէտք է սպառնալիքի տակ դնէ խաղաղ հոլովոյթը Հիւսիսային Իրլանտայի մէջ եւ Պելֆասթեան համաձայնագիրներու կատարումը»:

Բրիտանական կառավարութեան ղեկավարին համաձայն, Եւրոպական Միութեան հետ բանակցութիւնները պէտք է կատարուին «կառուցողականօրէն, յարգանքի եւ համագործակցելու անկեղծ ձգտումի ոգիով»:

Ան ընդգծած է, որ Բրիտանիան պիտի չփորձէ մնալ ընդհանուր շուկայի անդամ, սակայն պիտի ձգտի առաւելագոյն մուտք ապահովել այնտեղ` «ազատ առեւտուրի վերաբերեալ նոր եւ յաւակնոտ համաձայնագիրի մը միջոցով»: «Մեր շահերէն կը բխի յանուն Բրիտանիոյ եւ Եւրոպական Միութեան գործընկերութեան առաւելագոյն ազատութեան տրամադրումը բրիտանական ընկերութիւններուն հետ առեւտուրի համար», գրած է Մէյ:

Անոր կարծիքով` Եւրոպական Միութենէն դուրս գալէ ետք համագործակցութեան մէկ յաւելեալ կարեւոր երեւոյթ պէտք է դառնայ «առաւելագոյն սերտ համագործակցութիւնը անվտանգութեան մարզին մէջ»: «Այն ինչ որ կը վերաբերի մեր անվտանգութեան մարմիններուն միջեւ տեղեկատուութեան փոխանակման կամ եւրոպական սահմաններու պաշտպանութեան միացեալ աշխատանքին, ապա մեզ անհրաժեշտ են առաւելագոյն սերտ յարաբերութիւններ», ընդգծած է ան:

Միւս կողմէ, Եւրոպական խորհրդարանին մէջ կը կարծեն, որ «Պրեքզիթ»-ը կրնայ չեղեալ նկատուիլ: Բրիտանական «Տի Ինտիփենտընթ» օրաթերթը կը յայտնէ, որ Եւրոպական Միութեան ու Բրիտանիոյ «ապահարզանը» կ՛ենթադրէ որոշ անցումային միջոցառումներ, որոնք սակայն պէտք չէ երեք տարիէն աւելի երկարին:

Փաստաթուղթը կը սահմանէ Եւրոպական խորհրդարանին համար «կարմիր գիծերը»` Բրիտանիոյ հետ բանակցութիւններու սկսելու համար: Լիզպոնի յայտնի 50-րդ յօդուածը, որ կը գործարկէ «Պրեքզիթ»-ը, կրնայ չեղեալ նկատուիլ` իբրեւ զիջում այն բրիտանացիներուն, որոնք չէին ուզեր հեռանալ Եւրոպական Միութեան կազմէն:

Փաստաթուղթին մէջ, որ պէտք է Եւրոպական խորհրդարանը հաստատէ յաջորդ շաբաթ, յստակօրէն կը նշուի, որ եթէ բրիտանացիները իրենց միտքը փոխեն, անոնք չեն կրնար ակնկալել աւելի լաւ պայմաններ եւ Եւրոպական Միութեան հետ աւելի լաւ գործարք, քան այն ինչ որ այժմ կայ:

31/03/2017 08:09