Ֆրանչիսկոս Պապ Լեհաստանի մէջ` 29 յուլիսի օրակարգը

(Ռատիօ Վատիկան) Ուրբաթ, 29 յուլիս 2016-ին, Քրաքովիայի առաքելական ճամբորդութեան երրորդ օրը, Ֆրանչիսկոս Պապ  առաւօտեան կանուխ, Քրաքովիայի արքեպիսկոպոսարանի մատրան մէջ  առանձնական սուրբ Պատարագ մատուցանելէ ետք, կ՝ուղղուի ՝՝Օզվիեչիմ՝՝ քաղաք  եւ հոն  կ՝այցելէ  հրեաներուն  ողջակիզման համակեդրոնական ճամբար - թանգարանը, որմէ ետք Քրաքովիա վերադարձին,  կ՝այցելէ քաղաքին մանկաբուժարանը,  ապա ՝ յետմիջօրէին,  ՝՝Պլոնիա՝՝ անուան տարածքին վրայ կը նախագահէ Ճանապարհ խաչի բարեպաշտական արարողութիւնը։

Առաւօտեան ժամը 9.20-ին, Օզվիեչիմ քաղաք ժամանումին , Նորին Սրբութիւնը կը դիմաւորուի Պիելսքօ թեմի եպիսկոպոսին ու  քաղաքապետին կողմէ։  Ողջունելէ ետք ներկաները Ֆրանչիսկոս Պապ ինքնաշարժով կ՝ուղղուի 700 մթ հեռաւորութեան վրայ գտնուող "Աուշվիցի" հրեաներու ողջակիզման ճամբար-թանգարանը։ 

Հոս նշենք,  թէ Սուրբ Յովհաննէս Պօղոս Բ  Քահանայապետը,  7 յունիս 1979-ին, Լեհաստան կատարած իր առաջին առաքելական ճամբորդութեան ընթացքին, այցելեց Աուշվիզի հրեաներու համակեդրոնացման ճամբարը, եւ աղօթեց ճամբարին մէջ գտնուող ՝՝Սուրբ Մասսիմիլիանօ Մարիա Քոլպէի՝՝ խցիկին մէջ , որուն մէջ Սուրբը  մահացած է։ 

Արժանի է նաեւ մէջբերել երջանկայիշատակ Սրբազան Քահանայապետին պատարագի ընթացքին արտասանած քարոզին մէջ հետեւեալ խօսքը "Հոս եկած եմ որպէս ուխտաւոր։  Ծանօթ էք,  որ քանի անգամ եկած եմ այս վայրը, սակայն՝  չէի կրնար հոս չի գալ որպէս Քահանայապետ....Աուշվիցը պատերազմի վկայութիւն է։ Պատերազմը իր հետ կը բերէ ատելութեան, կործանումի եւ դաժանութեան անհամաչափ ալիք։

Յայտնենք նաեւ թէ   Պենետիկտոս  ԺԶ վաստակաւոր Քահանայապետը եւս Աուշվիցի ճամբարը այցելած է` 28 մայիս 2006-ին՝ Լեհաստան կատարած առաքելական ճամբորդութեան վերջին օրը։