Ս. Աստուածածնի Ուխտի Օր Զմմառու վանքին մէջ

Զմմառու Հայոց վանքին Տիրամօր «Ուխտի օր»-ն էր Կիրակի 29 Մայիս 2016-ը : Ուստի ինչպէս ամէն տարի՝ այս տարի եւս տօնական մթնոլորտի մէջ ու մեծ հանդիսութեամբ՝ արժանաւորապէս նշուեցաւ Ամենասուրբ Կոյսին նուիրուած ամսուան վերջին կիրակին Զմմառու վանքի բացօթեայ բակին մէջ, Զմմառու վանքի Վարչական Խորհուրդի կազմակերպութեամբ և   մասնակցութեամբ Հայ Կաթողիկէ բոլոր Ժողովրդապետութիւններուն, ինչպէս նաեւ Ս. Մեսրոպ և Ս. Գրիգոր Լուսաւորիչ Սկաուտներուն, ՀԿՄ Պատանեկան Միութեան և շեփորախումբին:

Առաւօտեան ժամը 10:00-ին, Ս. Աստուածամօր արձանով կազմուած թափօրը ուղղուեցաւ դէպի վանքի մուտքի բացօթեայ խորանը: Թափօրին ընթացքին՝ Միաբան Հայրերը, դպրեվանքի սաները, զանազան միութիւններու անդամները և բոլոր ուխտաւորները խոր հաւատքով վարդարան կ'աղօթէին, իսկ ՀԿՄ-ի շեփորախումբը Ս. Կոյսը գովաբանող նուագներ կը հնչեցնէր:

Ապա ժամը 10:30-ին, Հայրապետական Սուրբ Պատարագը մատուցեց Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Գրիգոր Պետրոս Ի. Կաթողիկոս Պատրիարքը, որուն ընթացքին ան իր Հայրապետական պատգամը փոխանցեց, օրուան խորհուրդը պարզելով հաւատացեալ ժողովուրդին:

«Ս. Միքայէլ և Երանելի Մալոյեան» դպրեվանքերու սաները պատարագի սպասաւորութիւնը ստանձնեցին, իսկ սրբազան երգեցողութիւնը կատարեց Ս. Փրկիչ ժողովրդապետութեան «Արծիւեան» երգչախումբը, ղեկավարութեամբ Մաէսթրօ Տիար Մանուէլ Քէշիշեանի:

Սուրբ և Անմահ Պատարագի աւարտին՝ Հոգեւոր Տէրն ու Վարչութիւնը թափօրով ուղղուեցան վանքիս դահլիճ, ուր ուխտաւորները աջահամբոյրով իրենց շնորհաւորութիւնները փոխանցեցին Ամենապատիւ Հոգեւոր Տիրոջ: Հուսկ  տեղի ունեցաւ յաւուր պատշաճի հիւրասիրութիւն:

Օրուան հանդիսութեան յաջորդեց միաբանական ագապ, որուն իրենց մասնակցութիւնը բերին Ամենապատիւ Հոգեւոր Տէրը, Գերապայծառ Տիարք, վանքի Վարչական խորհուրդը, միաբան և թեմական վարդապետներ, «Ս. Միքայէլ և Երանելի Մալոյեան» դպրեվանքերու սաներն ու «Արծիւեան» երգչախումբի անդամները:

Յետմիջօրէի ժամը 3:00-ին, Վարդարանի աղօթքը մեծ ջերմեռանդութեամբ կատարուեցաւ, գլխաւորութեամբ Ամենապատիւ Հոգեւոր Տիրոջ և մասնակցութեամբ բոլոր հոգեւորական դասուն, նորընծաներուն և ուխտաւորներու հոծ բազմութեան:  

Այսպէս՝ աւարտեցաւ Զմմառու Ցաւագին Տիրամօր ձօնագրուած «Ուխտի օր»ը, որուն ընթացքին բոլոր ուխտաւորները անոր մայրական միջնորդութեամբ օրհնուեցան Աստուծմէ և իւրաքանչիւր ուխտագնաց ուրախացուց և գովաբանեց Ս. Տիրամայրը, անոր անարատ Սրտին յանձնելով իր կեանքը: