Չինաստանի կառավարութիւնը դրականօրէն արձագանգած է Քահանայապետի ելոյթին։
(Ռատիօ Վատիկան) Չինաստանի մասին “Asia Times” գործակալութեան հետ ունեցած մէկ ելոյթով ֆրանչիսկոս Պապը իր մեծ հիացումը յայտնած էր Չինաստանի հանդէպ` անոր մեծ մշակոյթի եւ անհատնում իմաստութեան համար։ Սրբազան Պապը այդ առթիւ իր բարեմաղթութիւնները յայտնած էր չինացի ժողովուրդին ու նախագահ Xi Jinping-ին, Չինական ամանորին առթիւ որ այս տարի կը զուգադիպի 8 Փետրուարին և նուիրուած է կապիկին։
Փեքինի իշխանութիւնները անյապաղ դրականօրէն արձագանգած են ֆրանչիսկոս Պապին վերոնշեալ ասուլիսին։ Արտգործ նախարարութիւնը ''յոյժ կարեւոր'' որակած է Պապին ասուլիսը եւ Չինական պաշտօնական մամուլը լայն տեղ տուած Սրբազան Հօր ելոյթին։
Արտգործ նախարարութեան բանբերը այս առթիւ յայտնած է թէ ''չինական կառավարութեան կամքն է շինարար երկխօսութիւն հաստատել Վատիկանի հետ և Ս﹒ Աթոռէն կը սպասէ ճկուն ու գործնականապաշտ կեցուածք մը` բարւոքելու համար կապերը''։
"Global Times" համայնավար կուսակցութեան թերթի տնօրէն-խմբագիրի գնահատումով Պապին բարի դիտաւորութիւնները կը սատարեն հեշտ դարձնել Չինաստանի ու Վատիկանի միջեւ յարաբերութիւնները։
"Ժողովուրդին Օրաթերթը" կը խնդակցի Պապին քաջալերանքին երկխօսութեան ու խաղաղութեան ի սպաս։ Օրաթերթը կը վերակոչէ Ս﹒ Աթոռին նպաստը դիւանագիտական յարաբերութիւններու վերահաստատումին ԱՄՆի ու Գուպայի միջեւ։ Օրաթերթը ապա կը հաստատէ որ Չինաստանի ու Վատիկանի միջեւ մօտեցումը կ՛արտացոլէ բազմաթիւ չինացիներու իղձը։
| All the contents on this site are copyrighted ©. |