Չինաստան 10 հազար թոն սննդամթերք պիտի յատկացնէ Սուրիոյ փախստականներուն համար: Panorama.am-ը՝ վկայակոչելով «Ռիա նովոսթի»-ն՝ կը հաղորդէ, որ այս մասին յայտարարած է Չինաստանի արտաքին գործոց նախարարը` ելոյթ ունենալով Լոնտոնի մէջ տեղի ունեցած համաժողովի ժամանակ: Ան ըսած է, որ այն միջոցները կրնան օգնել երկրին մէջ մարդասիրական իրավիճակը լաւացնելուն:
Չինաստանի արտաքին գործոց նախարարին խօսքով, Սուրիոյ մէջ մարդասիրական խնդիրներու լուծման համար անհրաժեշտ է ոչ միայն օգնութիւն ցուցաբերել, այլ նաեւ անոնց յառաջացման պատճառները հանել:
Երէկ Լոնտոնի մէջ վերջ գրաւ Սուրիոյ օգնութեան հարցով նուիրատուներու համաժողովը: Մասնակիցները պայմանաւորուած են հաւաքել աւելի քան 10 միլիառ տոլար սուրիացիներուն օգնելու համար, որմէ 6 միլիառը պիտի յատկացուի այս տարուան ընթացքին, եւս 5 միլիառ` մինչեւ 2020 թուականը:
Միջոցներուն մէկ մասը պիտի ուղղուի Սուրիոյ մարդասիրական օգնութեան, մէկ մասը` Սուրիոյ եւ հարեւան երկիրներու զարգացման ուղղուած տարբեր ծրագիրներու իրականացման եւ այլ խնդիրներու լուծման համար:
All the contents on this site are copyrighted ©. |