Հայաստանի մէջ քաղցկեղ ունեցող 8500 հիւանդ կայ

ԵՐԵՒԱՆ, «Նիուզ».– 4 Փետրուարի դրութեամբ Հայաստանի մէջ կայ քաղցկեղ ունեցող շուրջ 8500 արձանագրուած հիւանդ՝ 2000ով աւելի, քան 2005ին: Լրագրողներուն հետ ունեցած զրոյցին ընթացքին այս մասին տեղեկացուցած է Ֆանարջեանի անուան Ուռուցքաբանութեան կեդրոնի ընդհանուր ուռուցքաբանութեան բաժինի վարիչ Ռաֆայէլ Սարգսեան։

Անոր համաձայն՝ Հայաստանի տղամարդոց մօտ քաղցկեղի ամէնէն տարածուած տեսակը թոքերու քաղցկեղն է: Հետաքրքրական է, որ ուռուցքաբաններուն տուեալներով, քաղցկեղի այդ տեսակի դէպքերուն աւելի քան 70 տոկոսը ուղղակիօրէն կապուած է ծխելու հետ: Հետաքրքրական է նաեւ, որ Հայաստանի մէջ քաղցկեղի այդ տեսակէն մահացութիւնը եւս բաւական բարձր է: Կիներու պարագային ամէնէն տարածուածը կաթնագեղձի քաղցկեղն է, սակայն անկէ մահացութիւնը աւելի ցած է, քան թոքերու քաղցկեղէ:

Ռաֆայէլ Սարգսեանի տուեալներով՝ Հայաստանի մէջ քաղցկեղով հիւանդացման առաւել բարձր մակարդակ արձանագրուած է Լոռիի եւ Շիրակի մարզերուն մէջ, իսկ առաւել ցած՝ Երեւանի եւ Գեղարքունիքի մարզին մէջ: Մասնագէտները չեն կրնար ճշգրիտ կերպով ըսել, թէ այս երեւոյթը ի՛նչի կապուած է՝ նշելով, որ քաղցկեղը բազմաթիւ պատճառներ ունի՝ կենսոլորտային, ժառանգականութիւն, կենսակերպ եւ այլն:

Ռաֆայէլ Սարգսեան նշած է նաեւ, որ քաղցկեղով հիւանդներուն թիւը տարուէ տարի կ՛աւելնայ ինչպէս ամբողջ աշխարհի, այնպէս ալ Հայաստանի մէջ։ Աշխարհի մէջ, օրինակ, վերջին տարուան ընթացքին քաղցկեղ ունեցողներու մօտ 12.6  միլիոն նոր դէպք արձանագրուած