՝՝Թուրքիան ներում չհայցեց՝՝ ըսաւ Փութին
Ռուսիոյ նախագահ Վլատիմիր Փութին խօսելով Թուրքիոյ օդուժին կողմէ «Սու-24» ռմբաձիգի վար առնուելուն մասին յայտնեց. «Մենք բացարձակապէս անբացատրելի կը նկատենք թիկունքին դաւաճանական հարուածները անոնց կողմէ, որոնց ահաբեկչութեան դէմ պայքարին մէջ գործընկերներ ու դաշնակիցներ կը նկատենք»:
«Թուրքիան գիտակցաբար փակուղի կը տանի Ռուսիոյ հետ յարաբերութիւնները. մինչեւ հիմա ո՛չ ներում հայցած են «Սու-24»-ի ջախջախման համար, ո՛չ առաջարկներ կատարած են վնասը հատուցելու վերաբերեալ, ո՛չ ալ խոստումներ տուած` պատժելու մեղաւորները», յայտարարեց Ռուսիոյ նախագահը:
«Մենք մինչեւ հիմա ո՛չ Թուրքիոյ քաղաքական բարձր մակարդակի ներողութիւնը, ո՛չ վնասի փոխհատուցման առաջարկներ, ո՛չ ալ կատարուած յանցագործութեան մեղաւորները պատժելու խոստումներ լսած ենք», նշեց ան` աւելցնելով. «Այն տպաւորութիւնը կը ստեղծուի, որ Թուրքիոյ ղեկավարութիւնը գիտակցաբար փակուղի կը մղէ ռուս-թրքական յարաբերութիւնները»:
Փութին ընդգծեց. «Այն ինչ որ երկու օր առաջ տեղի ունեցաւ Սուրիոյ երկինքին վրայ, կը հակասէ առողջ բանականութեան եւ միջազգային իրաւունքին. օդանաւը հարուածուած է Սուրիոյ տարածքին մէջ»:
| All the contents on this site are copyrighted ©. |