(Ռատիօ Վատիկան) Չորեքշաբթի` 25 նոյեմբերի առաւօտեան 8.01-ին, սկիզբ առաւ Ֆրանչիսկոս Քահանայապետին միջազգային առաքելական 11-րդ ճամբորդութիւնը որ զինք կ՛առաջնորդէ Ափրիկեան ցամաքամաս` Քենիա, Ուկանտա եւ Կեդրոնական Ափրիկէ։
Ֆրանչիսկոս Քահանայապետէն առաջ Քենիան այցելած է նաեւ Սուրբ Յովհաննէս Պօղոս Բ երեք անգամներ` 1980-ին 1985-ին եւ 1995-ին։
Քենիայի ճամբորդութեան կարգախօսն է ''Զօրաւոր եղէք հաւատքի մէջ։ Մի Վախնաք''։
7 ժամ 15 վայրկեան տեւող ճամբորդութենէ ետք, տեղական ժամով յետմիջօրէի 5-ին (Իտալիոյ ժամով 15,00-ին) Սրբազան Քահանայապետին օդանաւը ժամանեց Քենիայի մայրաքաղաք` Նայրոպիի ''Եոմօ Քենիաթթա'' միջազգային օդակայան ուր զինք դիմաւորեց Քենիայի նախագահ` Ուհուրու Քենիաթթա, պետական ու եկեղեցական բարձրաստիճան անձնաւորութիւններու պատուիրակութեան մը ներկայութեամբ։
''Փրոթոքոլային'' արարողակարգէն ետք Սրբազան Հայրը օդակայանի յատուկ սրահին մէջ ստորագրեց նախագահական ոսկէ մատեանը ապա շքախումբով ուղղուեցաւ Նայրոպիի նախագահական պալատ` ուր նախատեսուած է Բարի Գալուստի պաշտօնական արարողութիւնը որուն ընթացքին Ֆրանչիսկոս Պապ` բացի Նախագահէն, հանդիպում կ՛ունենայ նաեւ Քենիայի դիւանագիտական մարմնի եւ կառավարական իշխանութիւններուն հետ։
All the contents on this site are copyrighted ©. |