Ամենապատիւ Տէր Գրիգոր Պետրոս Ի. Կաթողիկոս Պատրիարքի գահակալութիւնը 9 օգոստոսին։

(Ռատիօ Վատիկան) Անցեալ շաբաթ` 25 յուլիս 2015-ին, Հայ Կաթողիկէ եկեղեցւոյ սիւնհոդոսական հայրերուն գումարած ընտրական սիւնհոդոսը, յայտարարեց Տանն Կիլիկիոյ Կաթողիկէ Հայոց 20-րդ Պատրիարքի անունը յանձինս` Փարիզի Հայ կաթողիկէներու վաստակաւոր առաջնորդ`  Արհ Գրիգոր Եպիսկոպոս Կապրոյեանի որ ընտրեց Գրիգոր – Պետրոս Ի անունը։

Ամենապատիւ Հոգեւոր Տիրոջ գահակալութեան արարողութիւնը տեղի պիտի ունենայ Զմմառու Պատրիարքական Աթոռ՝ Զմմառու Վանքին մէջ, յառաջիկայ կիրակի` 9 օգոստոս 2015-ի, կէսօրէ ետք ժամը 5-ին:

Յետ ընտրութեան եւ յայտարարութեան Ամենապատիւ տէր Գրիգոր Պետրոս Ի. Կաթողիկոս Պատրիարքի, 25 յուլիս 2015-ին, Ասորի կաթողիկէ Եկեղեցւոյ պատրիարք` Եունան եւ  Մարոնիթ եկեղեցւոյ Պատրիարք` կարդինալ Ռայի ու մարոնի եպիսկոպոսներ, հերթաբար այցելեցին նորընտիր Հոգեւոր Տէրը,  շնորհաւորելու նորընտրեալը եւ Հայ Կաթողիկէ Եկեղեցին: Նոյն օրը Լիբանանու մէջ Պապական նուիրակ` գերապայծառ Կապրիելէ Քաջջա այցելեց Սիւնհոդոսական հայրերը եւ շնորհաւորեց նորընտիր Պատրիարքը ու ապա անոնց հետ միասին բաժնեկցեցաւ եղբայրական սիրոյ ճաշը։

Ֆրանչիսկոս Քահանայապետը` ի լուր Գրիգոր – Պետրոս Ի ընտրութեան շնորհաւորագիր մը ուղղեց անոր որուն մէջ յայտնեց իր մեծ ուրախութիւնը­, ապա նորընտիր Պատրիարք Հօր շնորհեց`  ըստ կանոնի նոյնինքն Գրիգոր –Պետրոս Ի-էն խնդրուած ''եկեղեցական  հաղորդութիւնը''։ Շնորհաւորագիրին մէջ Սրբազան Պապը Նորընտիր Պատրիարքին առաքելութիւնը յանձնեց Յիսուս Քրիստոսին ու անոր Մօր Մարիամ Աստուածամօր հովանիին, ու իր առաքելական օրհնութիւնները փոխանցեց Պատրրիարքին ու համայն Պատրիարքութեան։