Ֆրանչիսկոս Պապին Էքաուտորի առաքելական այցելութեան 7 յուլիսի յայտագիրը։

(Ռատիօ Վատիկան) Երեքշաբթի` 7 յուլիս 2015-ին տեղական ժամով առաւօտեան 8-ին (Հռոմի ժամով 15-ին) Ֆրանչիսկոս Սրբազան Քահանայապետը կ՛այցելէ Քիթոյի  ''Բարք տէլ Պիսենեթենարիօ'' այգիի տարածք, ուր հանդիպում կ՛ունենայ Էքուատորի եպիսկոպոսաց  համահաւաք դասի անդամներուն հետ։ Համահաւաք դասի նախագահ եպիսկոպոսին բարի գալուստի խօսքէն ետք Ֆրանչիսկոս Պապը սրտաբուխ խօսքը կ՛ուղղէ եպիսկոպոսներուն­, ապա հանդիպումի աւարտին,  ''Բարք տէլ Պիսենեթենարիօ''ի շրջանը կատարելէ ետք նոյն վայրին մէջ կը հանդիսապետէ Սուրբ պատարագի արարողութիւնը (Հռոմի ժամով 17,30-ին) մասնակցութեամբ տեղական եպիսկոպոսներուն ու կղերական դասին, ինչպէս նաեւ 1,5 միլիոնէ աւելի հաւատացեալներուն։

Յայտնենք թէ ''Բարք տէլ Պիսենեթենարիօ''-ի բացումը կատարուած է 27 ապրիլ 2013-ին, ան կառուցած է նախկին օդակայանի տարածքին վրայ, ուր 1985-ին Յովհաննէս Պօղոս Բ ժամանած էր։

Սուրբ պատարագի արարողութեան աւարտին Ֆրանչիսկոս Պապը կը փոխադրուի Քիթոյի առաքելական նուիրակութիւն։

Յետմիջօրէի ժամը 16,15-ին (Հռոմի ժամով 23,15-ին) Ֆրանչիսկոս Պապը այցելութիւն կը կատարէ 1946-ին հիմնադրուած Էքուատորի Քահանայապետական Կաթողիկէ համալսարանին ուր ժամը 16,30-ին (Հռոմ 23,30) հանդիպում կ՛ունենայ դպրոցական եւ համալսարանական աշխարհին հետ անոնց ուղղելով ճար մը։ Հանդիպումը վերջ կը գտնէ Ֆրանչիսկոս Պապին առաքելական օրհնութեամբ որմէ ետք Սրբազան Քահանայապետը կ՛ուղղուի Ֆրանչիսկեան միաբանութեան պատկանող Քիթոյի Սան Ֆրանսիսքօ աբբայարան որուն եկեղեցւոյ սեմին Քիթոյի քաղաքապետը Քահանայապետին կը յանձնէ քաղաքին բանալիները։

Սան Ֆրանսիսքոյի վանքը կը հանդիսանայ համայն Լատին Ամերիկայի ամենահին կաթողիկէ կրօնական կառոյցը։ Սան Ֆրանսիսքոյի վանքին մէջ Սրբազան Հայրը տեղական ժամով 18-ին (հռոմի ժամով առաւօտեան կանուխ 1-ին)  հանդիպում կ՛ունենայ քաղաքացիական աշխարհին հետ անոնց ուղղելով ճար մը։ Հանդիպման աւարտին Ֆրանչիսկոս Պապը կ՛ուղղուի Յիսուսեաններու ''Իկլեզիա Տէ լա Քոմբանիա'' կեդրոն  ուր առանձնական հանդիպում կ՛ունենայ կեդրոնի հասարակութեան հետ  ամբողջացնելով առաքելական 9-րդ ճամբորդութեան  երրորդ օրուան յայտագիրը։