Մարոնի համայնքի Պշարա Ռայի պատրիարքը կիրակի 5 յուոլիսին, փոխադրուեցաւ մարոնի համայնքի պատրիարքութեան ամարանոցը` Տիման, ուր նախագահեց կիրակի օրուան պատարագին:
Ռայի պատրիարքը յայտնեց, որ ինք ոչ մէկ հարց ունի քրիստոնէական հանրաքուէին իմաստով, եթէ այդ մասին մարոնի համայնքի երեսփոխանները համաձայնութիւն յայտնեն:
Այս առումով Ռայի պատրիարքը նշեց, որ ինք Փոփոխութիւն եւ բարեկարգում համախմբումի ընդհանուր քարտուղար, երեսփոխան Իպրահիմ Քանաանը եւ Լիբանանեան ուժեր կուսակցութեան ղեկավարի խորհրդատու Մըլհեմ Ռիաշին տեղեակ պահած է, թէ հանրաքուէն հակասահմանադրական է ու կարիքը ունի մարոնի երեսփոխաններուն համաձայնութեան եւ պատրաստակամութիւն յայտնած, որ այդ մասին համախոհութիւն գոյանալու պարագային ինք պատրաստ է զիրենք Պքերքէ հրաւիրելու` քննարկելու համար այդ կարելիութիւնը:
Միւս կողմէ, Ռայի պատրիարքը այցելեց «Սաութ Լուպնան» ձայնասփիւռի կայանը, որուն վարչութեան հետ իր հանդիպումին ընթացքին ողջունեց ձայնասփիւռի այդ կայանին առաքելութիւնը` ընդգծելով, որ Լիբանանի մէջ իսկական տեղեկատուութեան կարիքը կայ:
Ռայի պատրիարքը շեշտեց նաեւ, որ իրաւունքի եւ ճշմարտութեան տէրերը կառչած կը մնան իրենց իրաւունքին եւ ոչ մէկ դժուարութենէ կը վախնան:
Ան կոչ ուղղեց պաշտպանելու երկրին եւ քաղաքացիին արժանապատուութիւնը:
All the contents on this site are copyrighted ©. |