2015-05-26 09:16:00

Սրբուհի Ռիթայի ուխտի օր Զմմառ գիւղի Սրբուհի Ռիթա մատրան մէջ


21/ 22/ 23 Մայիս 2015-ին, երեկոյեան ժամը 7:00-ին, հրաշագործ և անկարելի խնդիրներու Սրբուհի Ռիթայի ուխտի օրուան առթիւ, Զմմառ գիւղի «Սրբուհի Ռիթա» փոքրիկ մատրան մէջ, յաջորդաբար Հինգշաբթի, Ուրբաթ և Շաբաթ օրերը, Սուրբ և Անմահ պատարագ մատուցանեց և քարոզեց Պէյրութի Թեմի Պատրիարքական Ընդհանուր Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վրդ. Մուրատեան: Ան յաւուր պատշաճի իր քարոզին մէջ՝ անդրադառնալով օրուան խորհուրդին, ըսաւ. «Հոգեկան գոհունակութեամբ անգամ մը եւս հաւաքուած են այստեղ միասնաբար տօնախմբելու Սրբուհի Ռիթայի տօնը, որուն հաւատքով զօրացած՝ մաքրենք մեր սրտերը մեղքերէն և մտքերը՝ չար խորհուրդներէն, որովհետեւ հաւատքն է որ մարդս կ'ապրեցնէ այս դժուար օրերուն»: Այսու կը յայտնենք մեր հաւատացեալ ժողովուրդին, թէ Մայիս ամիսէն սկսեալ մինչեւ Սեպտեմբեր, ամէն Շաբաթ երեկոյեան ժամը 7:00-ին, Սուրբ և Անմահ Պատարագ պիտի մատուցուի Զմմառ գիւղի «Սրբուհի Ռիթա» փոքրիկ մատրան մէջ: Շաբաթ 30 Մայիս 2015-ին, երեկոյեան ժամը 7:00-ին, «Սրբուհի Ռիթա» մատրան մէջ մատուցուած Սուրբ և Անմահ Պատարագի աւարտին՝ Զմմառու վանքի Մեծաւոր՝ Հ. Գաբրիէլ Թ.Ծ.Վրդ. Մուրատեան պիտի կատարէ նորակառոյց Մար Շարպէլի փոքրիկ սրբատեղիին նաւակատիքը: Կոչ կ'ուղղենք մեր հաւատացեալ և ուխտաւոր ժողովուրդին մասնակցելու այս հոգեպարար արարողութեան, հաղորդակից դառնալով օրուան սրբազան խորհուրդին:








All the contents on this site are copyrighted ©.