Մեծ Պահքն ունի եօթը Կիրակիներ որոնք ունին իրենց յիշարժան օրերը՝ Բուն բարեկենդան, Արտաքսման,
Անառակի, Տնտեսի, Դատաւորի, Գալստեան եւ Ծաղկազարդ: Ժողովրդական սովորութեան համաձայն՝
Մեծ Պահքի կէսը՝ Միջինքի օրը, բաղարջ հացի կարկանդակ կը պատրաստեն, որու մէջ մետաղադրամ
կը դնեն: Սովորութեան համաձայն՝ բաժին հասնող մետաղադրամը յաջողութիւն կը բերէ: Ի
տարբերութիւն այլ եկեղեցիներու, որոնք պարզապէս կը թուակարգեն Մեծ պահքի 7 Կիրակիները,
Հայաստանեայց Եկեղեցին սուրբ գրային հիմք ունեցող իւրայատուկ անուններով ու խորհուրդներով
օժտած է այս Կիրակիները որոնք կը կազմեն խորհրդանշական շղթայ մը՝ արտացոլացնող մարդու
դրախտային կեանքի, պատուիրանազանցութեան ու անկման, Աստուածորոնումի եւ Աստուածային նախախնամութեամբ
փրկագործութեան ողջ ընթացքը: Պահքերու (բացառութեամբ օրապահքերու) նախորդ օրերը կը
կոչուին «բարեկենդան», իսկ Մեծ Պահքին կը նախորդէ Բուն Բարեկենդանը: Բարի կենդանութիւն,
այսինքն` բարի, անհոգ եւ երջանիկ կեանք. այս իմաստն է ամփոփուած «բարեկենդան» անուան
մէջ, որ առաւելագոյնս արտայայտուած կը տեսնենք Բուն Բարեկենդանի խորհուրդին մէջ, որը
Մեծ Պահքի առաջին Կիրակին է եւ կը պատկերացնէ մարդու դրախտային երանաւէտ կեանքը: Այս
խորհուրդը կ’երեւի նաեւ սնունդի օգտագործման մէջ, որովհետեւ Բուն Բարեկենդանը կենդանական
եւ ճոխ ուտելիք գործածելու վերջին օրն է: Մեծ պահքի երկրորդ Կիրակին կը կոչուի Արտաքսման
եւ կը խորհրդանշէ մարդու` դրախտէն արտաքսուիլը եւ Աստուծոյ տեսութենէն զրկուիլը: Ահաւասիկ,
այս կը խորհրդանշէ բոլոր Մեծ Պահքի շրջանին եկեղեցիներու վարագոյրներու փակ մնալը եւ
Ս. Հաղորդութիւնէն հաւատացեալներու անմասն մնալը: Երրորդ Կիրակին կը կոչուի Անառակի
եւ կը մատնանշէ առ Աստուած դառնալու եւ կորուսեալ դրախտը գտնելու կարեւորագոյն նախապայմանը`
ապաշխարանքը: Չորրորդ` Տնտեսի Կիրակին, կ՛ուսուցանէ նիւթական հարստութեան տնօրինման
կերպի դերը յաւիտենական փրկութեան կամ կորստեան մէջ: Հինգերորդ` Դատաւորի Կիրակին,
կը պատգամէ յարատեւ աղօթքի անփոխարինելի նշանակութիւնը փրկութեան համար: Վեցերորդ`
Գալստեան Կիրակին, որ այնպէս ինչպէս կ՛ամփոփէ Քրիստոսի Ա. Գալստեան խորհուրդը, այնպէս
ալ Երկրորդ Գալստեան խոստումը: Մեծ Պահքին անմիջապէս յաջորդող շաբաթը կը կոչուի Աւագ
Շաբաթ եւ կ՛ընդգրկէ Փրկչին երկրային կեանքի վերջին կարեւորագոյն իրողութիւնները` յաղթական
մուտքը Երուսաղէմ (Ծաղկազարդ), Վերջին Ընթրիքը, Մատնութիւնը, Չարչարանքները, Խաչելութիւնը,
Մահը, Թաղումը եւ ի վերջոյ հրաշափառ Յարութիւնը` Ս. Զատիկը