Ֆրանսայի նախագահ Ֆրանսուա Օլանտ Ապրիլ 24-ին` Հայոց ցեղասպանութեան 100-րդ տարելիցին
օրը, ներկայ պիտի գտնուի Երեւանի մէջ տեղի ունենալիք Ցեղասպանութեան զոհերու յիշատակի
ոգեկոչման արարողութիւններուն: Ըստ Panorama.am-ի՝ Ֆրանսական “Ֆրանս 24” հեռուստալիքի
փոխանցումով` Օլանտ նաեւ կոչով դիմած է Թուրքիոյ: Ան Թուրքիոյ կոչ ըրած է նոր քայլեր
ձեռնարկել մէկ դար առաջ տեղի ունեցած հայերու զանգուածային սպանութիւններու եւ կոտորածներու
վերաբերեալ “ճշմարտութեան” հասնելու ուղղութեամբ, ինչպէս նաեւ նշած է, որ “թապուները
կտրելու ժամանակն է”: “Ճշմարտութեան ուղղութեամբ ջանքերը պէտք է շարունակուին, եւ
ես համոզուած եմ, որ Ցեղասպանութեան հարիւրերորդ տարելիցի տարին Ցեղասպանութեան ճանաչման
ուղղութեամբ կը տեսնենք նոր քայլեր”,- նշած է Օլանտ: Յիշեցնենք, որ Ֆրանսայի նախագահը
երէկ մասնակցած է Ֆրանսայի հայկական կազմակերպութիւններու համակարգող խորհուրդի ամենամեայ
ընթրիքին, ուր ներկայ եղած են նաեւ Ֆրանսայի ներքին գործոց նախարարը, Փարիզի քաղաքապետը
եւ այլ պաշտօնատար անձիք: