Իսրայէլեան օդուժը Դամասկոսի օդակայանին մօտ գտնուող երկու պահեստանոց եւ Տիմասի մէջ
երկու շրջան հարուածեց
Իսրայէլեան օդուժը, երէկ Կիրակի, 7 դեկտեմբերին, Դամասկոսի միջազգային օդակայանին մօտ
գտնուող երկու պահեստանոցներ եւ Լիբանանի հետ սահմանին մօտ գտնուող Տիմասի մէջ երկու
շրջան հարուածեց: Ըստ տեղեկութեանց, իսրայէլեան ռմբաձիգները ընդհանուր առմամբ 10 յարձակումներ
գործեցին: Իսրայէլեան պատերազմական օդանաւերը նաեւ թռիչքներ կատարեցին Տարաայի եւ Քնէյթրայի
վերեւ: Սուրիական պաշտօնական աղբիւրներ յայտնեցին, որ մարդկային վնասներ չեն արձանագրուած: Ըստ
«Լուպնան 24» կայքին եւ լիբանանեան «Էլ.Պի.Սի.» պատկերասփիւռի կայանին, իսրայէլեան յարձակումները
թիրախ դարձուցին զէնքեր, որոնք Լիբանան կ՛ուղղուէին: Նշենք, որ իսրայէլեան օդանաւերը
երէկ առաւօտէն ի վեր հարաւային Լիբանանի եւ Սուրիոյ հետ Լիբանանի սահմանին վերեւ թռիչքներ
կը կատարէին: Սուրիական բանակի սպայակոյտը իսրայէլեան յարձակումները նկատեց Սուրիոյ
գերիշխանութեան բացայայտ բռնաբարում, ինչպէս նաեւ ահաբեկիչներուն աջակցութիւն: Սպայակոյտը
նշեց, որ այսպիսի յարձակումները ահաբեկչութեան դիմակայումի շարունակումը պիտի չարգելակեն: Իսրայէլեան
իշխանութիւնները մերժեցին մեկնաբանել լուրը: Իսրայէլեան պատկերասփիւռի 10-րդ կայանը օդային
հարուածներուն լուրը հաղորդեց` վկայակոչելով արտասահմանեան լրատուամիջոցներ, իսկ իսրայէլեան
պատկերասփիւռի 2-րդ կայանը հաղորդեց, որ իսրայէլեան պաշտօնական աղբիւրներ մերժած են մեկնաբանել
լուրը: