Ֆրանչիսկոս Պապի Թուրքիա կատարելիք առաքելական ճամբորդութեան յայտագիրը։

(Ռ.Վ. 28 նոյեմբեր 2014) Ուրբաթ` 28 նոյեմբերէն մինչեւ Կիրակի 30 նոյեմբեր, Ֆրանչիսկոս Պապը, ընդառաջելով Թուրքիոյ նախագահին, Կ. Պոլսոյ Տիեզերական Պատրիարք` Բարթողոմէոս Ա ին եւ Կաթողիկէ եկեղեցւոյ եպիսկոպոսաց համահաւաք դասի հրաւէրին, կ՛ այցելէ Անգարան եւ Իսթանպուլը։
Սրբազան Քահանայապետը ուրբաթ 28 նոյեմբերի առաւօտեան ժամը 9-ին կը մեկնի Հռոմի Ֆիումիչինօ Օդակայանէն եւ Անգարայի օդակայան կը ժամանէ 13-ին։
Բարի գալուստի պաշտօնական արարողութիւնը տեղի կ՛ունենայ Նախագահական Պալատին մէջ, ուր Ֆրանչիսկոս Պապը հանդիպում կ՛ունենայ քաղաքական իշխանութիւններուն հետ անոնց ուղղելով ճառ մը։
Նոյն օրը Ֆրանչիսկոս Պապը կ՛այցելէ Մուսթաֆա Քեմալ Աթաթուրքի դամբարանը, կը հանդիպի Թուրքիոյ վարչապետին եւ ''կրօնական գործունէութեանց'' նախագահին հետ։
Շաբաթ 29 նոյեմբերի առաւօտեան, Նորին Սրբութիւնը օդանաւով կը փոխադրուի Իսթանպուլ ուր նախ կ՛այցելէ Այա Սոֆիայի թանգարանը, Սուլթան Ահմէտի մզկիթը, հուսկ ''Սուրբ Հոգի'' կաթողիկէ աթոռանիստ եկեղեցւոյ մէջ կը մատուցէ սուրբ պատարագը որմէ ետք նախատեսուած է համամիութենական աղօթք մը Սուրբ Գէորգ Պատրիարքական եկեղեցւոյ մէջ, որուն կը յաջորդէ առանձնական հանդիպում Կ. Պոլսոյ տիեզերական պատրիարք` Բարթողոմէոս Ա-ին հետ։
Ճամբորդութեան վերջին օրը` Սուրբ Գէորգ Պատրիարքական Եկեղեցւոյ մէջ նախատեսուած է ծիսակատարութիւն, որուն աւարտին պիտի ստորագրուի միացեալ յայտարարութիւն մը եւ տեղի պիտի ունենայ համամիութենական օրհնութիւն, ուստի` սիրոյ ճաշ, Ֆրանչիսկոս Պապի ու Բարթողոմէոս Ա- ի ներկայութեամբ, որուն ընթացքին Սրբազան Հայրը ճառ մը կ՛արտասանէ ներկաներուն։
Յետմիջօրէին Նորին Սրբութիւնը հրաժեշտ կ՛առնէ եւ ժամը 17-ին կը մեկնի Իսթանպուլի օդակայանէն, եւ մէկ ժամ 40 վայրկեան տեւող թռիչքէ ետք կը Հասնի Հռոմի Չամփինօ օդակայան։
Սրբազան Քահանայապետի այս 6-րդ միջազգային առաքելական ճամբորդութեան նպատակն է մասնակցիլ Կ.Պոլսոյ Եկեղեցւոյ հիմնադիր եւ Սուրբ Պետրոս առաքելապետի եղբայր Սուրբ Անդրէաս առաքեալի` տօնախմբութիւններուն որպէս նշան երկխօսութեան Հռոմի եւ Կ.Պոլսոյ եկեղեցիներու միջեւ։