Արամ Ա. Կաթողիկոս ընդունեց Միջին Արեւելքի Քրիստոնեայ համայնքներուն համախմբումի վարչութիւնը
Հինգշաբթի, 27 Նոյեմբեր 2014-ի առաւօտուն, Արամ Ա. Վեհափառ Հայրապետին այցելեց Միջին
Արեւելքի Քրիստոնեայ Համայնքներուն Համախմբումի վարչութիւնը գլխաւորութեամբ Մազլում Արքեպիսկոպոսին
։ Շուրջ չորս տարիներ առաջ կեանքի կոչուած յիշեալ համախմբումին մաս կը կազմեն Միջին Արեւելքի
բոլոր քրիստոնեայ համայնքները՝ իրենց կրօնական թէ աշխարհական ներկայացուցիչներով։ Համախմբումին
նպատակն է գործակցութիւն յառաջացնել շրջանի քրիստոնեայ համայնքներուն միջեւ և ազդու կարելիութիւններ
որոնել քրիստոնեաները Միջին Արեւելքէն ներս պահելու ու անոնց ներկայութիւնը աւելի ամրապնդելու։
Վարչութեան անդամները տեղեակ պահեցին Նորին Սրբութիւնը վերջին ամիսներու համախմբումին
կատարած աշխատանքներու մասին և պարզեցին յառաջիկայ ծրագիրները։ Վեհափառ Հայրապետը
ողջունելով վարչութեան տարած աշխատանքները, թելադրեց առաջնահերթութիւն տալ բոլոր այն
ծրագիրներուն, որոնց նպատակը քրիստոնէութեան պահպանումն է Միջին Արեւելքէն ներս։ Այս
ծիրէն ներս Նորին Սրբութիւնը անդրադարձաւ Վիեննայի մէջ վերջերս գումարուած համագումարին
և յառաջիկային այլ շրջաններու մէջ տեղի ունենալիք նախաձեռնութիւններուն, որոնք կը հետապնդեն
նոյն նպատակը։ Հանդիպման ընթացքին նաեւ անդրադարձ եղաւ Լիբանանի նախագահական ընտրութեան։
Վեհափառ Հայրապետը ընդգծեց շուտաբոյթ նախագահական ընտրութիւններ կատարելու հրամայականը։