(Ռ.Վ. 24 նոյեմբեր 2014) Սուրբ Յովհաննէս Պօղոս Բ-ի, 1988-ին կատարած պաշտօնական
այցելութենէն ետք, Ֆրանչիսկոս Սրբազան Քահանայապետը, 25 նոյեմբերին, կ՛այցելէ Եւրոխորհրդարանի
եւ Եւրոպայի խորհուրդի կեդրոնները որ կը գտնուին Ֆրանսայի Սդրազպուրկ քաղաքին մէջ, ի
շառս եւրոպական քաղաքական այլ հիմնարկներու եւ հաստատութիւններու։ Սդրազպուրկը արդարեւ
Բ համաշխարհային պատերազմէն ետք, դարձաւ Եւրոմիութեան կարեւոր եւ իւրայատուկ քաղաք` ուր,
ինչպէս նշեցինք, կեդրոնացած են եւրոպական շատ մը հաստատութիւններու ներկայացուցչութիւնները։
Սդրազպուրկի պատմական կարեւորագոյն կառոյցներէն նկատուած է ''Նոթր Տամ'' աթոռանիստ եկեղեցին,
որ կառուցուած է 1015 – 1439 թուականներու ընթացքին։ Եւրոպայի խորհրդարանը` եւրոմիութեան
օրէնսդիր մարմինն է։ Միակ միջազգային հիմնարկը որուն անդամները ընտրուած են եւ ոչ թէ
նշանակուած, 508 միլիոն եւրոպացիներու քուէարկութեամբ։ Եւրոպայի խորհրդարանի կեդրոնը
Սդրազպուրկ հաստատուած է 1999 թուականին։ Եւրոպայի խորհրդարանը ունի 751 երեսփոխաններ
որոնք կը ներկայացնեն եւրոմիութեան 28 երկիրները։ Եւրոպայի խորհրդարանի նախագահն է գերմանացի
Տիար Մարթին Շուլցը որ Եւրոպայի խորհրդարանի` առաջին նախագահն է որ երկու անգամ ընտրուած
է որպէս նախագահ`առաջինը 2012-ին եւ ապա 2014-ին։ Եւրոպայի Խորհուրդը ` եւրոպական
միջ կառավարական ամենահին հաստատութիւնը որ կը ներառէ եւրոպական երկիրներու ամենամեծ
թիւը։ Արդարեւ Եւրոպայի Խորհուրդին մաս կը կազմեն 47 երկիրներ, որոնց շարքին նաեւ Հայաստանը։
Եւրոպայի Խորհուրդին մաս կը կազմեն 2 մարմիններ` Նախարարներու կոմիտէն եւ երեսփոխանական
հաւաքը ու անոր պատկանող հաստատութիւններու շարքին է` Մարդու Իրաւունքներու եւրոպական
ատեանը `(1959)։ Եւրոպայի Խորհուրդի նախագահն է Նորվեկացի 63 ամեայ` Տիար Թորպիորն Եակլանտը։