Ֆրանչիսկոս Քահանայապետի հանդիպումը ՖԱՕ-ի պաշտօնեաներուն հետ։
(Ռ.Վ. 20 նոյեմբեր 2014) Հինգշաբթի, 20 նոյեմբերին, ՖԱՕ-ի տուած այցելութեան
ծիրէն ներս, Ֆրանչիսկոս Քահանայապետը հանդիպում ունեցաւ Միջազգային կազմակերպութեան պաշտօնեաներուն։
Անոնց ուղղած իր պատգամին մէջ Ֆրանչիսկոս Պապը շնորհակալութիւն յայտնեց անոնց ընծայած
ծառայութեան , ինչպէս նաեւ մաղթանք յայտնեց ապրելու համերաշխութեամբ իրենց ընտանեկան
միջավայրին մէջ։ ՝՝Ձեր թանկարժէք աշխատանքին ընթացքին, յաճախ կը հանդիպիք սովորական
եւ արտակարգ ձեռնարկներու՝ գիւղատնտեսութեան բարգաւաճումին ի սպաս, ինչպէս նաեւ վատ
սննդարարութեան դէմ պայքարի ի խնդիր, որպէս հեռանկար ունենալով աշխարհին մէջ անօթութեան
նուազումը եւ գիւղատնտեսութեան զարգացումը'' ըսաւ Ֆրանչիսկոս Պապը ու հրաւիրեց ՖԱՕ-ի
պաշտօնեաները ըլլալու եղբայրասէր տկարներուն հանդէպ՝ ունենալով որպէս տիպար` Յիսուս Քրիստոսը
որ իր ուսերուն վրայ կրեց մարդկութեան տառապանքն ու ցաւերը։ Նորին Սրբութիւնը հուսկ քաջալերեց
ներկաները երբեք դժուարութիւններուն դիմաց յուսախաբութեան չմատնուելու եւ պատրաստակամ
ըլլալու՝ աջակցելու միշտ ուրիշներուն` ու յոյսով նայելու ապագային՜՜։ Ֆրանչիսկոս Պապը,
ՖԱՕ աշխատաւորներուն ուղղած պատգամը եզրափակեց անոնց ապահովելով Իր աղօթքը ու անոնցմէ
խնդրելով որ աղօթեն իրեն եւ իր եկեղեցւոյ տուած ծառայութեան դիտաւորութեան։