Մինսքի Խմբակի համանախագահները Երեւան եւ Պաքու իրենց այցելութեան շուրջ յայտարարութիւն
տարածած են։
ԵԱՀԿ-ի Մինսքի խմբակի համանախագահները 14-18 հոկտեմբերին Երեւան եւ Պաքու իրենց կատարած
այցելութեան արդիւնքներուն շուրջ յայտարարութիւն տարածած են: ԵԱՀԿ-ի կայքին վրայ զետեղուած
յայտարարութեան մէջ կը նշուի, որ ռուս եւ ֆրանսացի համանախագահները անցեալ շաբաթ այցելած
են Ազրպէյճան եւ Հայաստան` պետական պաշտօնատարներու հետ հանդիպելու եւ հայ-ազրպէյճանական
սահմանին ԵԱՀԿ-ի հսկողութեան առաքելութեան մասնակցելու համար: Այցելութեան ծիրին մէջ
համանախագահներուն միացած է նաեւ ԵԱՀԿ-ի գործող նախագահի անձնական ներկայացուցիչ դեսպան
Անճէյ Քասփրչիք: Ամերիկացի համանախագահ Ճէյմս Ուորլիք անձնական պատճառներով չէ կրցած
անոնց միանալ, սակայն այցելութեան ընթացքին ամերիկեան կողմը ներկայացուած եղած է: Պաքուի
մէջ համանախագահները հանդիպում ունեցած են Ազրպէյճանի նախագահ Իլհամ Ալիեւի, Երեւանի
մէջ` Հայաստանի նախագահ Սերժ Սարգսեանի հետ: Երեւանի մէջ համանախագահները խորհրդակցութիւններ
ունեցած են նաեւ արտաքին գործոց նախարար Էդուարդ Նալբանդեանի հետ: Երկու մայրաքաղաքներուն
մէջ համանախագահները քննարկած են Ֆրանսայի նախագահ Ֆրանսուա Հոլանտի հրաւէրով այս ամիս
Փարիզի մէջ նախատեսուող հանդիպումին պատրաստութիւնները: Համանախագահները յիշած են
Սոչիի եւ Կալեսի մէջ նախագահներու վերջին հանդիպումները եւ նշած, որ շփման գիծի եւ սահմանի
երկայնքով իրավիճակը կայունացած է այս ամառ նկատուած լարուածութեան աճէն ետք: Անոնք նաեւ
յոյս յայտնած են, որ զինադադարի խախտման վերջին դէպքերը աշխուժ բնոյթ պիտի չկրեն: Նախագահներու
հետ հանդիպումներէն բացի, համանախագահները մասնակցած են հայ-ազրպէյճանական սահմանին ԵԱՀԿ-ի
հսկողութեան առաքելութեան: Սահմանի երկու կողմերուն վրայ անոնք հանդիպած են տեղւոյն պաշտօնատարներուն
եւ հրամանատարներուն հետ` անվտանգութեան պայմաններու մասին տեղեկութիւններ ստանալու համար: Համանախագահները
կոչ ուղղած են կողմերուն քայլերու ձեռնարկելու լարուածութիւնը նուազեցնելու եւ մասնաւորաբար
քաղաքային բնակչութեան դէմ բռնութիւնը կանխարգիլելու համար: