''Սիւնհոդոսի ճանապարհով դէպի Ֆիլատելֆիայ 2015''։

Երեքշաբթի, 16 սեպտեմբեր 2014-ի առաւօտեան ժամը 11,30-ին, Սուրբ Աթոռի մամլոյ գրասենեակի ՅՊԲ անուան սրահին մէջ, տեղի ունեցաւ մամլոյ ասուլիս` որուն ընթացքին, Ֆիլատելֆիայի Արքեպիսկոպոս` գերապայածառ Շարլ Ժոզէֆ Շաբութ եւ Ընտանիքի Քահանայապետական խորհուրդի նախագահ` գերապայծառ Վինչէնցօ Փալիա ներկայացուցին` Ֆիլատելֆիայի մէջ 2015-ի սեպտեմբերին կայանալիք ''ընտանիքներու համաշխարհային ութերորդ հաւաքի'' նախապատրաստական աշխատանքներու ընթացքը` ''Սիւնհոդոսի ճանապարհով դէպի Ֆիլատելֆիայ 2015'' բնաբանով։
Յայտնենք որ 5-19 հոկտեմբեր 2014, Վատիկանի մէջ տեղի կ՛ունենայ եպիսկոպոսական արտակարգ սիւնհոդոսը նուիրուած ընտանիքին, որուն նիւթն է ''Ընտանիքի հովուական մարտահրաւէրները աւետարանութեան ծիրէն ներս'' եւ որուն աշխատանքները պիտի շարունակուին եկող տարի` 2015-ին գումարուելիք սովորական սիւնհոդոսին ընթացքին, որուն աւարտին նախատեսուած է սիւնհոդոսական վաւերաթուղթի հրապարակումը։

Իր միջամտութեան ընթացքին գերապայծառ Փալիա ներկայացուց` Ընտանիքի 2015-ի հաւաքին եւ Ընտանիքի մասին սիւնհոդոսին հայող ձեռնարկները սկսեալ յառաջիկայ 28 սեպտեմբերին Վատիկանի մէջ կազմակերպուած` Ֆրանչիսկոս Քահանայապետի 40 հազար մեծ պապիկ ու մեծ մաիկներու հետ հանդիպումէն։
Գերապայծառ Փալիա ապա ներկայացուց Ընտանիքի Քահանայապետական խորհուրդին այս առթիւ հրատարակած գիրքերը, ուսումնասիրութիւնները ինչպէս նաեւ տեսերիզները։ Ան հուսկ խօսեցաւ Սիւնհոդոսի հետ կապուած ձեռնարկներու մասին որոնց շարքին` 22-24 Յունուար 2015-ին ''միասին վերընթեռնուլ ընտանիքի մասին սիւնհոդոսը'' խորագիրով միջազգային համագումարը, ''Evangelium vitae'' շրջաբերական թուղթի հրապարակման 20-րդ ամեակի նշումը ու այլ մշակութային ձեռնարկներ։