Սիրելի՛ ընթերցող, ամէն տարի, սեպտեմբեր 8-ին, մեր եկեղեցին, որ մայրը եւ դաստիարակն
է իր հաւատացեալներուն ու մտահոգ` անոնց յաւիտենական երջանկութեամբ, կը կատարէ` «Տօն
ծննդեան Սրբոյ Կուսին Մարիամու Աստուածածնին»: Այս տօնախմբումին խորհրդածութեան համար
սիւնակիս նիւթը կ՛առնեմ երրորդ աւետարանիչէն` Ս. Ղուկասէն այն հատուածը, որ ծանօթ է «Մեծացուսցէ»
վերտառութեամբ (Ղկ. 1,39-56): «Մեծացուսցէ» բայով կը սկսի Մարիամի շնորհակալութեան
ու փառաբանութեան երգը, որ թէպէտ Նազարէթի Կոյսին ծանօթ Հին Կտակարանին տարբեր մատեաններու
մէջ նմուշներ ունի, բայց եւ այնպէս ինքնասաց ու սրտաբուխ օրհներգութիւնն է: Ուղղափառ
ու կաթողիկէ եկեղեցիներուն երգաղօթքն է երախտագիտութեան եւ գովաբանութեան: Վանականութեան
ամէնօրեայ սիրերգն է աղօթական: Մարեմասէր իւրաքանչիւր կրօնաւորին ու հոգեւորականին լո՜ւռ
սրտաբխումն է առօրեային մէջ: «Մեծացուսցէ»-ն սիրական բնագիրն է միջազգային երաժշտութեան
մէջ: Հսկաներ, ինչպէս` Պախ, Վիվալտի եւ Հենտըլ, կատարեցին յօրինումներ: Նաեւ` սուրբ պատարագին
ու ժամերգութեան մեր տոհմային երգեցողութիւնն ունի շատ գեղեցիկ եղանակներ: Համաշխարհային
գրականութենէն կը յիշեմ ֆրանսացի Փոլ Քլոտելի 1907-ին եւ սպանացի Ֆեռնանտօ Փեսսոայի 1933-ին
գրած մարեմագով «Մեծացուսցէ»-ները: «Մեծացուսցէ»-ն մեներգող Կոյսը Յովակիմի եւ Աննայի
դուստրն է, որուն ծննդեան տօնը սկսած է արեւելքի մէջ Զ. դարակէսին, որովհետեւ ինչպէս
Մարիամի Որդիին` Յիսուսի ծնունդը դարձաւ աղբիւրը մարդերու ցնծութեան, նոյնպէս Փրկչին
Մօր ծնունդն ալ եղաւ ուրախութիւնը մարդկութեան: Այս ցնծութեան եւ ուրախութեան արտաքին
ու ներքին արձագանգն է Ամենայն Հայոց կաթողիկոս Յակոբ Ա. Կլայեցի հոգեւոր տիրոջ (1268-1287)
յօրինած «Երգեցէ՛ք, որդիք Սիոնի» սկզբնաբառերով ծանօթ խորհրդագեղ շարականը, որմէ այս
մէջբերուած իմացութիւններով հրճուինք եւ հրճուեցնենք: «Երգեցէ՛ք, Սիոնի որդինե՜ր,
նոր երգ մը Տիրամօր ծնունդին, որովհետեւ Ան, որ լոյս աշխարհ բերաւ Հօրմէն անժամանակ Ծնեալը,
այսօր ծնաւ (Աննայի) ամուլ արգանդէն, եւ օրհնութիւն տուէ՛ք Անոր, որ մեզի շնորհեց Լուսամայրը: Ցնծացէ՛ք,
մարդերու որդինե՜ր, ծնունդով սուրբ Կոյսին, որովհետեւ Ան, որ Անտանելին առանց սերմին
կրեց իր արգանդին մէջ, այսօր ծլաւ Յեսսէի արմատէն, եւ օրհնութիւն տուէ՛ք Անոր, որ մեզի
շնորհեց Լուսամայրը: Հրեշտակին աւետիսով` ամուլ Աննա ծնաւ աշխարհին ուրախութիւնը`
Մարիամը, որ հին օրէնքը Տուողը մարմնով ծնաւ իբրեւ Պարգեւիչը նոր կտակին. օրհնութիւն
տուէ՛ք Անոր, որ մեզի շնորհեց Լուսամայրը: Դուն, արուսեակէն առաջ Հօրմէն ծնած Բանին
Մա՜յր, ուրախացի՛ր, որ մարդերուն երկնային Լոյսը ծագեցիր իբրեւ Լուծիչը մեղքերու մթութեան,
եւ հայցէ՛ Բանէն, որպէսզի մեզ ազատէ մեր մեղքերէն»: Յիսուսի բերած ցնծութեան ու Մարիամի
տուած ուրախութեան գովերգութիւնն է «Մեծացուսցէ»-ն, զոր աստուածայղի ու քրիստոսակիր Կոյսը
հնչեցուց, երբ այցելեց իր Եղիսաբէթ ազգականին, որ, «լեցուած Ս. Հոգիով»` ներբողեց Կոյսին
Աստուածամայրութիւնն ու հաւատքը. «Որքան մեծ բարիք է, որ Տիրոջս Մայրը կու գայ ինծի:
Երանի՜ անոր, որ հաւատաց, թէ պիտի իրագործուին Տիրոջ կողմէ իրեն ըսուած խօսքերը» (Ղկ.
1,43, 45): «Մեծացուսցէ»-ն Մարիամի հաւատաբո՛րբ պատասխանն է Գաբրիէլի ծանուցած խորհուրդներուն:
Նախ` բացայայտեց շնորհավիճակը Նազարէթի Կոյսին: Երկրորդ` աւետեց անոր անարատ սրտին մէջ
ըլլալիք մարդեղութիւնը Աստուածային Երկրորդ Անձին: Իրաւացի է Մարիամ, երբ առաջնահերթօրէն
յայտարարեց. «Անձս կը փառաբանէ Տէրը»: Ամէն բանէ առաջ ու վեր է Տիրոջ մեր տալիք փառատրութիւնը: Ճիշդ
է Մարիամ, երբ պատճառաբանեց իր ուրախութիւնը. «Հոգիս կը ցնծայ Աստուծով` իմ Փրկիչովս»:
Աստուծմէ դուրս չի կրնար ուրախանալ մեր ներաշխարհը: Իմաստուն է Մարիամ, երբ իր ընտրութիւնը
վերագրեց Որդի-Փրկչին արժանիքին: Ամէն հոգեկան արժէքի եւ բարեմասնութեան ելակէտն է մեր
խոնարհութիւնը: Ներհայեցող է Մարիամ, երբ նախատեսեց. «Այսուհետեւ բոլոր ազգերը պիտի
երանեն զիս»: Երկինքէն սկսած, Գաբրիէլէն յայտնուած եւ Եղիսաբէթէն շարունակուած մարեմագով
սիրերգութիւնը միշտ կը ծորի Աստուծոյ յաւերժութեան մէջ: Նոր Կտակարանին առաջին աստուածերգողն
է Մարիամ, երբ շնորհակալ սրտով ներբողեց. «Հզօրը, որուն Անունը սուրբ է, սքանչելիքներ
ըրաւ ինծի»: Գիտնա՛նք երախտագէտ ըլլալ Տիրոջ, որ արժանի ըլլանք մնալու Անոր երկրպագուները: Մարիամ
կը սիրէ մեզ, երբ մեզի կը թելադրէ ըլլալ աստուածապաշտ, որովհետեւ Տիրոջ «բարութիւնը սերունդէ
սերունդ կը տարածուի իր երկիւղածներուն վրայ»: Մարիամ կը սիրէ մեզ, երբ մեզ կը խրատէ
ըլլալ խոնարհ ու հեզ, քանի Տէրը «տարածեց զօրութիւնը իր բազուկին եւ ցրուեց հպարտները
իրենց սրտի խորհուրդով»: Մարիամ կը սիրէ մեզ, երբ մեզի կը սորվեցնէ ճամբան մեծութեան:
Տէրը «տապալեց հզօրները իրենց գահերէն, իսկ խոնարհները բարձրացուց»: Մարիամ կը սիրէ
մեզ, երբ մեզ կը դաստիարակէ ապաւինիլ նախախնամութեան, որ` «քաղցածները յագեցուց բարիքներով,
իսկ հարուստները ճամբեց ձեռնունայն»: Մարիամ կը սիրէ մեզ, երբ մեզի կ՛ապահովցնէ սիրայօժար
գթասրտութիւնն Աստուծոյ, որ` «օգնութիւն ըրաւ իր ծառային», հաւատարիմի՛ն, պատուիրապահի՛ն: Մարիամ
կը սիրէ մեզ, երբ մեզի կը յիշեցնէ, թէ իր խօսքին Տէրն է Աստուած այնպէս, «ինչպէս ըսած
էր մեր հայրերուն` Աբրահամին եւ ասոր սերունդին` յաւիտեան»: Կ՛աղօթեմ, որ դուն, ես
եւ ան` մենք ապաւինինք մեր Մօր վճիտ սիրոյն` անկէ վարակուելով, որպէսզի մենք ալ կարենանք
հնչեցնել «մեծացուցէ»-ն մեր կեանքին: ՄԵՍՐՈՊ ՀԱՅՈՒՆԻ