Պասքերու Խորհրդարանը ճանչցաւ Լեռնային Ղարաբաղի Ինքնորոշման իրաւունքը։
ԵՐԵՒԱՆ, «Երկիր».- Ուրբաթ, Սեպտեմբեր 12ին, Եւրոմիութեան տարածքային խորհրդարաններու
պատմութեան մէջ առաջին անգամ ըլլալով վաւերացուած է փաստաթուղթ մը, որ կ՛աջակցի Լեռնային
Ղարաբաղի ինքնորոշման իրաւունքին: Ըստ «Հայաստանի եւրոպացի բարեկամներ» կազմակերպութեան՝
Պասքերու խորհրդարանին մէջ Սեպտեմբեր 12ին վաւերացուած փաստաթուղթը կը խրախուսէ պաշտպանել
Լեռնային Ղարաբաղի ժողովուրդին ժողովրդավարութեան սկզբունքները՝ անկախ ստեղծուած բարդ
իրավիճակէն: Փաստաթուղթին մէջ կը նշուի, որ Ղարաբաղի ժողովուրդն իրաւունք ունի ընտրելու
սեփական ապագան, մասնաւորապէս՝ իր ինքնորոշումը, որ առանցքային տարր է հակամարտութեան
կարգաւորման որեւէ բանակցային գործընթացի համար: Նաեւ կը շեշտուի, որ Լեռնային Ղարաբաղի
մասնակցութիւնը կարեւոր է ԵԱՀԿ Մինսկի խմբակի՝ հակամարտութեան կարգաւորման նուիրուած
բանակցութիւններուն: «Հայաստանի եւրոպացի բարեկամներ»ու աջակցութեամբ, ԼՂ արտաքին
գործող նախարար Կարէն Միրզոյեան մեկնած է Պասքերու երկիր, ուր կատարած է պաշտօնական այցեր,
հանդիպած՝ խորհրդարանի բարձրաստիճան պաշտօնեաներուն, օրէնսդիր մարմինի ղեկավար Պաքարտխօ
Թեճերիա Օթերմինի, գերատեսչական եւ գլխաւոր տեղական իշխանութիւններուն, նաեւ՝ տարածաշրջանով
հետաքրքրուող կազմակերպութիւններու հետ: 1979էն ի վեր, Պասքերու երկիրը Սպանիոյ 17
ինքնավար համայնքներէն մէկն է եւ ունի մօտաւորապէս 2.5 միլիոն բնակչութիւն, ինչպէս նաեւ
գործադիր եւ օրէնսդիր սեփական մարմիններ: Շրջանի խորհրդարանը ենթապետական խորհրդարաններէն
մէկն է, որ կը վայելէ լիակատար իրաւասութիւն Եւրոպական Միութեան տարածքին: